3 Voertuie sover in Bloemfontein-onluste sedert gister uitgebrand

Bloemfontein onluste3
Nog 2 voertuie in betogings op R701 uitgebrand
Nog twee voertuie is Dinsdag in die vroeë oggendure op die R701-pad buite Bloemfontein uitgebrand toe betogers vir ’n tweede dag die pad versper en motoriste met klippe bestook het.

Sewe mense is in hegtenis geneem en sal na verwagting Woensdag op aanklagte van openbare geweld en opsetlike saakbeskadiging in die landdroshof in Bloemfontein verskyn, sê sers. Ikobeng Hlubi, ’n polisiewoordvoerder.

Dit is die tweede dag dat inwoners van Dinaweng, buite Bloemfontein, betoog en die R701 tussen Reddersburg en Dewetsdorp versper.

 Die onluste het Maandagoggend uitgebreek toe oproeriges die pad versper en motoriste met klippe bestook het.

Die inwoners eis onder meer erwe om huise te bou.

’n Afleweringsvoertuig is Maandag deur oproeriges uitgebrand.

Die polisie het die geweld Maandagoggend onder beheer gekry en die betogers uitmekaar gedryf, maar hulle het Dinsdagoggend weer toegeslaan en nog twee voertuie, ’n afleweringsbussie en ’n gesinsmotor, uitgebrand.

Hlubi kon nie Dinsdag die gerugte bevestig dat winkels in die township deur oproeriges geplunder is nie. Die pad is nog vir verkeer gesluit.

Niemand is tot dusver in die geweld beseer nie.

Bron: Netwerk24


 

Enjoyed this post? Share it!