Aandag enkelmediumskole: Posisioneer julself, want julle gaan geteiken word.

Dit was die raad van Chris Klopper, uitvoerende hoof van die Suid-Afrikaanse Onderwysersunie (SAOU), die afgelope drie weke aan skoolhoofde in al die provinsies ná ’n uitspraak verlede maand in die konstitusionele hof oor beheerliggame se magte.

“Na aanleiding van die hofuitspraak [dat die provinsiale departement van onderwys kan besluit waar kinders moet skoolgaan] is dit duidelik dat enkelmediumskole geteiken gaan word.

“Ek het die afgelope drie weke met hoofde van verskillende provinsies gesels en gesê: ‘Kom ons kyk na die uitspraak en ons interpreteer dit reg.’ ”

Klopper sê hy het ’n beroep op alle skoolhoofde gedoen om hul eie huis skoon te hou en terselfdertyd opvoedkundig in die beste belang van die skoolgemeenskap en kinders op te tree.

“Jy moet politieke intelligensie aan die dag lê: Dink proaktief.”

Sy raad aan hoofde was dat elke skool die bepalings van die nasionale norme en standaarde moet bestudeer en ’n objektiewe studie gaan doen oor hul skool se kapasiteit.

“Gaan praat met jou plaaslike distrikskantoor, gaan stap deur jou skool en gaan kyk of jy oor of onder jou kapasiteit is. Kry daardie papierspoor ingestel.”

’n Skool moet in die posisie wees dat indien dit na ’n dubbelmediumskool moet oorskakel, hy alles in sy vermoë moet doen om die beste moontlike dubbelmediumskool te word.

Skole moet ook hul taal- en toelatingsbeleid gaan bestudeer. “Kry dit 100% reg en maak seker jy is in staat om prosesse te bestuur; jy wil nie in ’n posisie beland waar prosesse jóú bestuur nie. Dan word jy die teiken van politieke ideologieë.”

Prof. Elda de Waal, dosent in onderwysreg aan die Noordwes-Universiteit, sê skole moet daarop ingestel wees om veel eerder voorkomend te beplan as om reaktief vure dood te slaan.

“As ’n skool wil slim wees, moet hy na hofuitsprake gaan kyk en stipuleer wat skole kan doen om sake te hanteer. ’n Mens kan voorkomend in jou eie gemeenskap wees en jou voelers uitsteek.”

Sy het voorgestel dat skole byvoorbeeld elke twee tot drie jaar hul skoolreëls hersien.

Skole moet prioriteitslyste opstel. “Twee skole se prioriteitslyste gaan nie dieselfde lyk nie.”

Die konstitusionele hof het vroeër uitspraak gelewer in die saak tussen die Federasie van Beheerliggame van Suid-Afrikaanse Skole (Fedsas) en die Gautengse departement van onderwys. Die hof het in die guns van die departement en Panyaza Lesufi, Gautengse LUR vir onderwys, beslis in hul geskil oor die magte van ’n beheerliggaam ten opsigte van skooltoelating.

Netwerk24


 

Enjoyed this post? Share it!