Aansoeke om spesiale stemme sluit Vrydag

Kiesers wat spesiale stemme in vanjaar se munisipale verkiesing wil uitbring, het nog tot komende Vrydag om aansoek daarvoor te doen.

Spesiale stemme is beskikbaar vir alle geregistreerde kiesers wat gestremd, siek of swanger is, asook vir lede van die veiligheidsmagte, verkiesingsbeamptes, media-personeel en enige ander kieser wat nie in staat sal wees om op 3 Augustus by stemlokale te kan gaan stem nie.

Kate Bapela, woordvoerder van die Onafhanklike Verkiesingskommissie (OVK), het Dinsdag gesê daar is twee soorte spesiale stemme.

 “Eerstens is daar huisbesoeke waar verkiesingsbeamptes kiesers in hul wonings besoek sodat hulle kan stem. Dit is gewoonlik slegs vir gestremde, siek of swanger kiesers beskikbaar.

“Dan is daar spesiale stemmery by stemlokale vir diegene wat nie op 3 Augustus in staat is om te stem nie.”

Bapela sê daar is tot op hede reeds meer as 285 000 aansoeke om spesiale stemme, waarvan 30% om huisbesoeke is.

Aansoeke om spesiale stemme kan vir die eerste keer ook aanlyn gedoen word deur die OVK se webwerf of per selfoon waar die kieser sy of haar identiteitsnommer na 32249 SMS.

Die SMS-keuse is slegs vir spesiale stemme by stemlokale.

Kiesers kan ook steeds by plaaslike OVK-kantore gaan aansoek doen om ’n spesiale stem.

* Die OVK het Dinsdag bevestig dat hy begin het om stembriewe vir die munisipale verkiesing te druk.

Die beleërde National Freedom Party (NFP), wat nie betyds sy deposito betaal het om aan die verkiesing deel te neem nie, se kandidate verskyn nie daarop nie.

Sabelo Sigudu, NFP-woordvoerder, het Dinsdag bevestig dat die NFP se naam nie op die stembrief verskyn nie.

Hy sê die NFP het Dinsdag ’n aansoek by die konstitusionele hof ingedien waarin die party vra dat hy wel toegelaat moet word om aan die verkiesing deel te neem.

Sigudu sê NFP-lede se grondwetlike regte sal geskend word as hulle nie in die verkiesing vir die party van hul keuse kan stem nie.

“Ons wag nou op die konstitusionele hof om die pad vorentoe te bepaal.”

* Die SAKP het Dinsdag gesê daar is beslissend opgetree teen individue wat hulle op ’n bedrieglike wyse vir die verkiesing in die party se naam en simbole geregistreer het.

Die SAKP neem nie aan verkiesings deel nie.

Alex Mashilo, SAKP-woordvoerder, sê die OVK is Maandag daaroor genader en die party se naam en simbole is van die stembrief verwyder.

Bron: Netwerk24


 

Enjoyed this post? Share it!