Afrikaanse skole drasties verminder met byna ‘n derde

Afrikaanse skole het vanaf 2002 van 1 814 tot 1 234 in 2016 afgeneem. Dit is ‘n afname van byna ‘n derde.

Die erkenning kom van die Minister van Basiese Onderwys, Angie Motshekga. Sy het egter nie die syfers van voor 2002 nie.

Sy beweer die rede hiervoor is weens ʼn ‘groter aanvraag’ van leerlinge na Engels en ʼn ‘afname’ in die aantal Afrikaanse leerlinge by skole.

Dit is ‘n bewys dat die aanslag teen Afrikaans ook op basiese onderwysvlak hewig is, sê Adv. Anton Alberts, die VF Plus se Parlementêre Woordvoerder oor Basiese Onderwys.

Adv. Alberts sê hy vind die Minister se antwoorde verstommend en die VF Plus se waarneming is allermins dat daar ʼn afname in die aantal Afrikaanse leerlinge is, maar dat daar eerder ʼn doelbewuste en stelselmatige uitwissing van Afrikaans in skole plaasvind.

“Daar is ʼn aggressiewe houding teenoor Afrikaans waar skole gedwing word om andertalige leerlinge in te neem waarna die proses van dubbelmedium en later totale verengelsing vinnig volg. ʼn Groot rede hiervoor is omdat daar nie nuwe skole gebou word nie en baie bestaande skole verwaarloos en in onbruik verval het.

“Gauteng se LUR van Onderwys, Panyaza Lesufi, se ongenaakbare stryd teen Afrikaanse skole dien as bewys hiervan.

“Ek sal gewis opvolgvrae aan die Minister stel, om te hoor op grond waarvan haar aannames berus. Dit behoort van objektiewe, wetenskaplike studies te kom. Ek sal haar ook weer konfronteer oor die beskerming van Afrikaanse skole en die skep van skole vir ander moedertale om Afrikaans sodoende te beskerm,” sê Adv. Alberts.

Foto – Hoërskool Hendrik Verwoerd, in Pretoria


Enjoyed this post? Share it!