ANC boos oor nuwe hoof van die Johannesburgse Metropolisie

Die ANC in Johannesburg het beswaar aangeteken teen David Tembe se aanstelling as die nuwe hoof van die Johannesburgse Metropolisie (JMPD) en gesê die party sal die minister van openbare dienste en administrasie versoek om Tembe se aanstellingsproses te ondersoek.

Maroela Media het vroeër berig Tembe, wat byna 20 jaar ervaring in die stad se nooddienste het en in 2003 as die direkteur van bedrywighede in die JMPD aangestel is, het Dinsdag in sy nuwe pos begin. Die ANC in Johannesburg was egter nie gelukkig met Tembe se aanstelling nie aangesien hulle verkies het dat genl. Eric Gala in dié posisie aangestel word.

Jolidee Matongo, die ANC se woordvoerder in Johannesburg, het in ʼn verklaring gesê die party verwerp Tembe se aanstelling omdat die stad se DA-administrasie volgens hulle die behoorlike werwings- en aanstellingsprosesse verontagsaam het.

Matongo het gesê Herman Mashaba, burgemeester van Johannesburg, het op 19 Oktober ʼn verslag voorgelê om Gala as die hoof van die metropolisie aan te stel en Tembe was as die vyfde kandidaat op dié verslag gelys. “Ná besprekings by hierdie vergadering het die burgemeester die verslag teruggetrek en die saak is na die bestuur terugverwys vir verdere oorweging,” het hy gesê.

“Na afloop van die raadsvergadering op 19 Oktober 2017 is daar nie weer onderhoude vir die hoof van die metropolisie gehou nie. In stede daarvan is ʼn nuwe verslag oor die aanstelling van die polisiehoof op 29 November 2017 aan die raad voorgelê. In hierdie verslag is David Tembe aanbeveel vir die aanstelling van die hoof van die metropolisie.”

Matongo het gesê die ANC-koukus in die Stad Johannesburg verwerp Tembe se aanstelling omdat “die vier kandidate wat die hoogste tellings behaal het nie die geleentheid gegee is om in die posisie aangestel te word nie”.

Matongo het ook ʼn eenparige aanbeveling deur die aanstellingspaneel verwerp dat Tembe, wat vyfde op die lys was, aangestel moet word aangesien die posisie ʼn noodsaaklike pos is en die stad iemand nodig het wat onmiddellik in die pos kan begin. Die eerste vier kandidate was nie geregistreerde lede van die munisipale polisiediens nie en dit sou maande geneem het om hulle nodige opleiding en registrasie af te handel.

“Hierdie aanbeveling van die paneel, as dit wel van die paneel gekom het, is duidelik ʼn bewys daarvan dat David Tembe nie die mees geskikte kandidaat vir die pos is nie. Daarom sal die ANC deur alle beskikbare kanale sy aanstelling beveg,” het Matongo gesê.

“Ons sal intussen die LUR vir samewerkende regering in die provinsie en die minister van openbare dienste en administrasie nader om ondersoek in te stel na die saak. Ons het ook al die nodige dokumentasie aan ons regspan gegee om met die proses te begin om hierdie aanstelling ter syde te laat stel.”

Deur: Maroela Media


Enjoyed this post? Share it!