ANC die enigste beweging wat ’n verenigde, nierassige, nieseksistiese, demokratiese en voorspoedige SA skep – Zuma jy grap seker nou!

Ondanks al die probleme wat hom in die gesig staar, bly die ANC die enigste beweging wat alle Suid-Afrikaners sover kan kry om ’n verenigde, nierassige, nieseksistiese, demokratiese en voorspoedige Suid-Afrika te skep.

Só het pres. Jacob Zuma gisteraand in Johannesburg op ’n dinee voor die begin van die ANC se vyfde beleidskonferensie vandag gesê.

Die dinee, wat deur die ANC se Progressive Business Forum gereël is, is deur sowat 30 ambassadeurs en talle sakelui bygewoon.

Adj.pres. Cyril Ramaphosa, een van die voorste kandidate om einde vanjaar die leierskap van die ANC oor te neem, kon nie die dinee bywoon nie. Hy is in Botswana waar hy die Suid-Afrikaanse regering op die begrafnis van oudpres. Ketumile ­Masire verteenwoordig, het dr. Zweli Mkhize, tesourier-generaal van die ANC, gesê.

“Ons glo Suid-Afrika is tans ’n beter plek om in te leef as ooit weens die ANC se beleide,” het Zuma gesê.

“Dit is ook ’n beter plek omdat die ANC nie alleen gewerk het nie.”
Hy het die private sektor, die georganiseerde arbeidsektor, tradisionele leiers, godsdiensorganisasies, nieregeringsorganisasies en alle ander sektore vir hul bydrae bedank.

“Ons sal met die sektore bly saamwerk, soos aan die hersiening van ons beleid.

“Ons is sterk besig om die nalatenskap van apartheid aan te pak en het die nasionale ontwikkelingsplan aanvaar om die uitdagings van armoede, werkloosheid en ongelykheid op te los.

“Terwyl die ANC goeie beleide het, moet ons die beleidskonferensie gebruik om meganismes te vind om hul doeltreffende toepassing te bespoedig. Dit sal ons hooffokus wees,” het Zuma gesê.

Zuma het ontspanne voorgekom en gereeld gelag.

“LAAT ONS AANHOU SAAMWERK DEUR DIE LAND EERSTE TE STEL. ENIGE VERSKILLE WAT ONS MAG HÊ, MOENIE ’N UITWERKING HÊ OP DIE BEHOEFTE OM DIE LAND EN SY MENSE EERSTE TE STEL NIE.

Hy het aan die hooftafel gesit saam met onder andere Sbu Dlamini, president van die vakverbond Cosatu, wat die president se bedanking eis, sowel as die mynmagnaat Patrice Motsepe.

Zuma het ook gepraat oor die probleme wat die ANC teister.

“Ons is vasbeslote om dit aan te pak. Ons het twee dae (van die beleidskonferensie) opsy gesit om op organisatoriese hernuwing te fokus.”
Volgens Zuma benodig Suid-Afrika ’n sterk, verenigde en gefokusde ANC.
“Ons het daarom ’n plig om te verseker dat ons alle uitdagings oplos wat die ANC verhinder om sy rol ten volle as leier van die samelewing te vervul.
“Laat ons aanhou saamwerk deur die land eerste te stel. Enige verskille wat ons mag hê, moenie ’n uitwerking hê op die behoefte om die land en sy mense eerste te stel nie.”

Volgens Zuma moet saamgewerk word om ekonomiese groei te stimuleer.
“Die vennootskap tussen die private sektor en die ANC, sowel as die regering, is goed vir die land en ons mense. Die ANC is sterker weens hierdie vennootskappe.”

Hy het gesê die ANC werk hard om maatskaplik-ekonomiese regverdigheid en gelykheid te bereik.

“Ons hou aan om na ons mense te luister, want ons verstaan dat die ANC te alle tye die parlement van die mense moet bly en dat die mense te alle tye ’n sê moet hê om die posisie van die ANC en sy benadering tot beleidsformulering te vorm.”


Enjoyed this post? Share it!