ANC-regime het beplan vir Zim se inploffing

Die Suid-Afrikaanse regime maak glo al maande lank gebeurlikheidsplanne vir die moontlikheid dat Zimbabwe finaal gaan ineenstort en vlugtelinge oor die grens kan stroom.

Hoewel die ANC-regime nie eintlik bekend is vir vooruitbeplanning nie, word aangevoer dat die departement van internasionale betrekkinge en samewerking in Desember begin het om beplanning te doen vir so ‘n scenario.

Die departement het volgens die praatjies vroeg vanjaar ‘n risiko-ontleding gedoen om as riglyn te dien indien burgerlike wanorde sou losbreek en uiteindelik sou hande uitruk.

Veral twee oorwegings speel ‘n rol hierin en dit is hoe moet ‘n toestroming van vlugtelinge hanteer word en hoe moet daar in die situasie ingegryp word?

Dit moet alles gesien word in die raamwerk dat Suid-Afrika se gewelddadige betogings nie eens plaaslik hanteer kan word nie. Die swak ekonomiese toestande in Suid-Afrika met sy hoë werkloosheidskoers, droogte, en politieke onrus weens onder andere misdaad soos plaasmoorde en -aanvalle asook aanstigting teen blankes ten opsigte van grondbesetting maak die land eintlik glad nie ‘n geskikte kandidaat om ‘n krisis in sy buurland, en die oorspoeling daarvan hierheen te hanteer nie.

‘n Groot hoeveelheid Zimbabwiërs bevind hulle reeds in Suid-Afrika omdat hulle oor ‘n tydperk van jare hierheen gestroom het.

President Robert Mugabe se grondonteiening en Afrika-diktatorskap het daarvoor gesorg dat Zimbabwe ‘n mislukte regering en land is.

En soos een Zimbabwiër op sosiale media opgemerk het oor die ondergang van sy land: dit was nie ‘n (eenmalige) gebeure nie, maar ‘n hele proses

Bron: Vyburger


Enjoyed this post? Share it!