Arsenaal wapens in besit gekry van Panjo die tier se baas

Die eienaar van Panjo die tier sal Vrydag in Springs formeel om borgtog aansoek doen nadat hy in ’n polisieklopjag met handgranate, springstof en sowat 1,5 miljoen koeëls vir drie verskillende soorte gewere in hegtenis geneem is.

Augusto Perreira Fernandes (65) het Donderdag vlugtig in die landdroshof in Springs op voorlopige aanklagte van oortredings van die Wet op Plofbare Stowwe en die besit van ongelisensieerde vuurwapens en ammunisie verskyn.

Die toneel waar die Valke op Fernandes se kleinhoewe tussen Delmas en Springs op myntoerusting en ’n magdom wapens beslag gelê het.

Kapt. Ndivuwo Mulamu, ’n Valke-woordvoerder, sê hy sal Vrydag formeel om borgtog aansoek doen en bly tot dan in polisieaanhouding.

Fernandes, wat destyds voorbladnuus was met sy geveg om sy mak tier, Panjo, te behou, word amptelik van die besit van ongelisensieerde vuurwapens, ammunisie, plofstof, toerusting om goud te ontgin en oortreding van die Vuurwapenwet aangekla.

Genl.maj. Prince Mokotedi, Valke-hoof in Gauteng, sê die Valke het op 22 Augustus op minstens een rewolwer, 19 jaggewere, ’n R5-magasyn, 36 ontstekers, polisietoerusting insluitend kentekens en handboeie, asook plofstof, afgekom.

Luidens ’n polisieverklaring is daar ook op handgranate, seinfakkels en 16 haelgewere op Fernandes se kleinhoewe beslag gelê. Die myntoerusting wat Fernandes na bewering gebruik het om onwettig goud te ontgin, het meer as R300 000 se goudstof gelewer.
Mokotedi sê die Valke hou Fernandes se aktiwiteite sedert Februarie dop. Die moontlikheid word ondersoek dat hy deel van ’n groep is wat met ander misdaadvoorvalle verbind word en homself aan onwettige jag skuldig gemaak het.

Panjo, die tier wat in 2010 uit Goosey Fernandes se bakkie gespring het en toe vermis geraak het. Hier is hy kort nadat hy teruggevind is in Fernandes se huis buite Groblersdal.

Panjo, die tier wat in 2010 uit Goosey Fernandes se bakkie gespring het en toe vermis geraak het. Hier is hy kort nadat hy teruggevind is in Fernandes se huis buite Groblersdal.

Lt.genl. Yolisa Matakata, waarnemende hoof van die Valke, sê in die verklaring dat “arsenale” nie in Gauteng welkom is nie, en waarsku “almal” dat die Valke hulle dophou. Sy sê die Valke fokus al hoe meer op individue wat ongelisensieerde vuurwapens en plofstof het en vrees in hul gemeenskappe inboesem.

“Ons moet nog al die bokse (geseëlde bokse in die motorhuis wat tot teen die dak gestapel was) uitpak. Daar is waarskynlik nog baie toerusting en wapens op die werf versteek en die honde-eenheid gaan ons daarmee help,” het Mokotedi Dinsdag gesê.

Fernandes was glo alleen by sy huis toe die Valke op hom toegeslaan het. Geen goud is op die perseel gevind nie.

Panjo die Bengaalse tier het jare lank op sy eienaars se leerrusbanke gelê en in swembaddens geplas, maar die Fernandes-gesin het in Mei verlede jaar bankrot gespeel.

Hulle het daarna R400 000 van weldoeners bymekaar geskraap om Panjo en 19 ander tiere en leeus uit hul insolvente boedel terug te koop.
Die familie het na wat berig is Absa sowat R8 miljoen geskuld en net “met die klere aan hul lyf” by die onderneming uitgeloop.


Enjoyed this post? Share it!