Bankrot SAL moet onder OB se vergrootglas kom

OB moet SAL se transaksie bekyk’

Kaapstad. – ’n Dag nadat die nasionale tesourie weer vir uitstel gevra het om die beleërde Suid-Afrikaanse Lugdiens se finansiële state aan die parlement voor te lê, is die openbare beskermer (OB) versoek om ’n omstrede transaksie van die lugdiens te ondersoek.

Die DA het gister die OB gevra om te ondersoek waarom die SAL ’n onbekende “boetiek-finansier”, BnP Capital, gekies het om hom te adviseer om sy skuld van R15 miljard te herstruktureer en om te help om die tekort aan finansiering in te samel.

In ruil hiervoor sal BnP Capital glo ’n prestasiebonus van R256 miljoen, “R171 miljoen meer as die gebruiklike koers in die mark”, van die sukkelende SAL kry wat die afgelope 21 jaar meer as R23 miljard se staatshulp ontvang het.

Hierdie DA-versoek kom ’n dag nadat Pravin Gordhan, minister van finansies, Donderdag die parlement gevra het om die indiening van die SAL se finansiële state vir die 2014-’15-boekjaar tot 15 September uit te stel hangende ’n aansoek vir ’n staatswaarborg wat die lugdiens se status as lopende saak sal verseker.

Die spertyd vir die indiening van die finansiële state is reeds drie keer tevore uitgestel en dit moes gister ingedien gewees het.

Alf Lees, DA-LP en adjunkwoordvoerder oor finansies, het gister gesê dit is noodsaaklik dat die OB Dudu Myeni, SAL-voorsitter, se betrokkenheid by die BnP Capital-transaksie omvattend ondersoek om te verseker dat staatsgeld nie misbruik word nie en dat staatsinstellings nie ’n koninkryk van die ANC-elite word nie.

Volgens Lees het Myeni in die verlede na bewering ook al twyfelagtige en eensydige besluite geneem om ’n onbekende maatskappy met noue bande met pres. Jacob Zuma by ’n Airbus-huurtransaksie te betrek.

Myeni self het noue bande met Zuma.

“Dit is geen geheim nie dat die SAL in ’n volledige finansiële ineenstorting is wat regstreeks aan Myeni toegeskryf kan word. Sy hou as gevolg daarvan aan om die vrystelling van die finansiële state te vertraag.

“Die finansiële gesondheid van die SAL sal slegs herstel word as Myeni as SAL-hoof afgedank word en die SAL se nie-presterende bates geprivatiseer word,” het Lees gesê.

Business Day het gister berig dat die SAL, wat die afgelope jaar geruk is deur skorsings, bedankings en interne ondersoeke, ook sy tesourier, Cynthia Stimpel, geskors het nadat sy die aanstelling van BnP Capital teengestaan het.

Die SAL het dié verwikkeling, asook of BnP Capital R256 miljoen sou verdien, ontken.

Intussen het Dennis Bloem, Copewoordvoerder, gister gesê voortgesette steun vir die ANC sal daartoe lei dat almal met mag die Grondwet met straffeloosheid sal verontagsaam, wat verder daartoe bydra dat instellings soos die SAL sal aanhou om die indiening van sy finansiële state by die parlement te vertraag.

Bron:Netwerk24


 

Enjoyed this post? Share it!