Basil Calitz speel dood en oorleef.

Aanval in SuidwesBasil Calitz speel dood en oorleef. (Foto nie vir sensetiewe kykers nie)

 

Des Erasmus

Basil Calitz leef danksy ’n skyndood wat hy voorgedoen het toe hy gisteroggend deur drie boewe in sy slaapvertrek by die Brandberg-ruskamp op Uis oorval is. Tot in daardie stadium het die bebaarde eienaar-bestuurder van herberg soos ’n tier teen ’n oormag van drie aanvallers geveg.
’n Noodrit is gister met Calitz na Swakopmund onderneem nadat hy die oggend omstreeks vyfuur in sy slaapplek aangeval, aangerand en ernstig beseer is. Sy aanvallers het die bebloede man in sy kamer vasgebind, hom daar vir die dood gelaat, die deur gesluit en uiteindelik met ’n skamele buit op die vlug geslaan.
Op Swakopmund is sy wonde gisteroggend met 27 steke geheg. Vollediger besonderhede van die aard van sy beserings sal oor ’n paar dae verkry word wanneer die swelsel aan sy kop gesak het en ’n studie van X-straalopnames gemaak is. In die stadium word ’n gekraakte skedel vermoed. Gisteroggend het Calitz ná behandeling in die Uis-kliniek daarop aangedring om op die dorp te bly sodat hy ’n ondersoekspan van Walvisbaai op die toneel kon bystaan.
Waar hy in die kliniek gewag het, het die geharde veldman selfs gevra dat hulle vir hom ’n koppie koffie moet bring. Vriende het hom gelas om te bly net waar hy is en waar hulle hom vir die noodrit Swakopmund sou kry.
Calitz het self vertel van die woeste geveg wat gisteroggend in sy slaapvertrek afgespeel het waar die drie mans hom oorval het.
Hy het van sy slaapplek opgekyk in ’n gevaarlike en lang skroewedraaier waarmee een van die aanvallers hom wou steek. Die man se hande is vasgegryp en ’n gestoei het ontstaan met Basil wat in daardie stadium reeds op sy voete was. Toe het een van sy aanvallers sy voete onder hom uitgeskop en het hy geval. In die stryd om beheer oor hom te kry, het die driemanskap die oortreksel van sy rekenaar afgeruk en dit oor sy kop getrek sodat die plunderaars rustiger met hul werk kon voortgaan. Tot in daardie stadium het hulle ook met ’n verblindende flitslig in sy oë geskyn sodat hy hulle moontlik nie kon identifiseer nie.

STROOPTOG
Hul volgende aanslag was om die duvet van sy bed te pluk om hom daarmee te verwurg terwyl hamerslae hom teen sy slape getref het. Dit was toe dat hy doodstil bly lê het met die hoop dat die mans sou aanvaar dat hy dood is. Hulle het hom nogtans aan sy hande gebind.
Daarna het die mans hul strooptog voortgesit en onder meer die kluis in Calitz se kantoor oopgebreek. Daarna het hulle ’n deur agter die kroegtoonbank oopgebreek om by ’n pakkamer uit te kom. Daarvandaan het hulle na die groter pakkamer beweeg, maar op die oog af met nie veel meer as N$900, ’n pakkie spek en ’n pakkie kaasworsies weggekom nie.
Calitz het ernstige wonde aan sy kop opgedoen toe hy met ’n hamer en ’n swaar yster geslaan is. Kommer bestaan ook oor ’n harde lyfhou wat hy oor sy rug gekry het. Hy is deur vriende van Uis na Swakopmund gebring nadat ’n eerste versorging gisteroggend deur kliniekpersoneel op Uis gedoen is.

SWAKOPMUND
Op Swakopmund was hy gister in die sorg van sy broer terwyl dokters oor sy toestand besin het. Toe is nog op die bevindings na X-straalondersoeke gewag. ’n Moontlikheid van skedelbreuk word genoem.
Die drie aanvallers het toegang tot die herberg gekry deur ’n glasdeur te breek. Hulle moes die plek geken het, want daar is reguit ná Calitz se slaapvertrek gestap. Ná die gruwel en die mislukte strooptog is die drie mans daar weg. Calitz is vasgebind in sy kamer laat lê met die aanvallers wat sy kamerdeur gesluit het voordat hulle koersgevat het.
’n Voorvrou in die kombuisgedeelte van die herberg, Mariaan Uys, val elke dag omstreeks 06:15 in om alles gereed te kry vir gaste se ontbytsessie. Sy was pas in die herberg toe sy Calitz se geroep uit sy slaapvertrek gehoor het: “Kom maak my los! Kom maak my los!”
Sy en helpers moes die deur na Calitz se slaapplek oopbreek nadat sy aanvallers met die sleutels weg is. Daar het hulle Calitz vasgebind, bebloed en in ’n ernstige toestand aangetref. Nog hulp is ontbied en Calitz is na die kliniek gebring en die voorval is by die polisie aangemeld.
Martie Duvenhage, die afgelope agt jaar ’n ontvangsdame in die herberg, sê Calitz se duur fotografiese en elektroniese toerusting is nie aan geraak nie. Die kamer self was ’n toneel van verskrikking met plasse bloed oral waar jy kyk.
Op Uis het ernstige kommer geheers oor ’n harde hou wat Calitz vermoedelik met die hamer as een van die aanvallers se wapens op sy regterslaap gekry het. Kommer het ook oor ’n ernstige oogbesering bestaan.
Op Uis staan Calitz bekend as een van die dorp se grootste weldoeners en vir die bystand wat hy aan mense en toeriste in nood in Damaraland bied. Juis sy gehardheid danksy sy veldlewe is gister op Uis deur vriende aangevoer as een van die redes vir sy oorlewing. – Republikein Maandag, 2016-01-04- BKA

Enjoyed this post? Share it!