Beitbrug tydelik gesluit na geweld

Die Beitbrug-grenspos tussen Suid-Afrika en Zimbabwe was Vrydag gesluit weens gewelddadige betogings wat aan albei kante van die grens ’n chaos veroorsaak het.

DIE GRENSPOS WAS VRYDAG TUSSEN 09:00 EN 13:00 GESLUIT TOE BETOGERS DIE PAAIE VERSPER HET.

Die onluste spruit uit ongelukkigheid oor streng nuwe invoerregulasies wat invoere van Suid-Afrika na Zimbabwe beïnvloed.

Dit sluit in ’n verbod op die invoer van gebottelde water, meubels, boumateriaal, staalprodukte, grane, aartappelskyfies en suiwelprodukte, wat meestal uit Suid-Afrika na Zimbabwe ingevoer word.

 Die Zimbabwiese owerhede het dié nuwe regulasies op 17 Junie aangekondig.

EWN berig minstens 71 mense is al weens die betogings in Zimbabwe in hegtenis geneem.

Sandile Memela, woordvoerder van die Suid-Afrikaanse Inkomstediens (SAID), het in ’n verklaring gesê die grenspos was Vrydag tussen 09:00 en 13:00 gesluit toe betogers die paaie versper het.

New Zimbabwe berig omgekrapte Zimbabwiese betogers het winkels geplunder en ’n pakhuis van die Zimbabwiese inkomstediens afgebrand.

Volgens Memela het ’n groep Suid-Afrikaners ook aan dié land se kant van die grens ’n betoging gereël.

Memela sê die polisie, SAID en departement van binnelandse sake moes toetree tot die situasie en die groep se leiers paai.

“Op ’n vergadering met die groepleiers is ooreengekom dat die griewe van die Suid-Afrikaanse handelaars aan die departement van handel en nywerheid voorgelê sal word.” Dié departement sal dan met die Zimbabwiese owerhede onderhandel.

Memela sê die SAID wens sy amptenare geluk omdat hulle die situasie aan die Suid-Afrikaanse kant vinnig ontlont en die betoging stopgesit het. Hy meen die rede vir die onluste was weens die “houding van die Zimbabwiese amptenare”.

EWN berig dat betogers die pad aan Zimbabwe se kant met klippe en brandende bande versper. Dit is onduidelik of die situasie daar al bedaar het.

Bron: Netwerk24


Enjoyed this post? Share it!