Bejaarde boer wat wreed aangeval en gemartel is op kleinhoewe buite Potchefstroom sterf

Opvolg: Victor Cooks (75), die man wat saam met sy vrou Gwen (74) op hul kleinhoewe in Potchefstroom aangeval en gemartel is, het vanoggend gesterf.

Cyril Cooks, hul seun, het dié nuus aan Maroela Media bevestig.

“Die susters het ons vanoggend 06:20 gebel en gesê dit lyk nie goed nie, en voor ons daar kon kom – 06:30 – was alles verby. Ons is baie dankbaar dat hy rustig gegaan het; hulle sê hy was baie rustig,” het Cooks gesê.
Volgens Cooks het hulle Victor baie onlangs na die Trimed Frailcare in Drie Riviere geskuif uit die Mediclinic in Vereeniging.

“Ons dink maar sy organe het net ingegee;, hy het baie breinskade opgedoen. My ma het haarself dink ek vir so twee of drie dae al voorberei maar ek dink die skok het nog nie ingesink nie,” het Cyril vertel.
Maroela Media het vroeër berig die egpaar is 17 Augustus kaal uitgetrek, aangerand en met kookwater en warm olie gebrand tydens die aanval op hul kleinhoewe net buite Potchefstroom.

Lees vorige berig:

Die rowers twee selfone, ʼn rewolwer, ʼn diamant- en pêrelring en ongeveer R300 kontant tydens die voorval gesteel.
Hy het gesê sy pa gaan soggens vroeg uit die huis om om te sien na die mak tarentale wat hulle op die kleinhoewe aanhou. Die egpaar is waarskynlik ʼn geruime tyd lank dopgehou omdat die aanvallers hulle gewoontes en roetine geken het.

“Hy het die oggend omstreeks 07:30 uit die huis uit gegaan om na die tarentale om te sien. Hy was skaars 15 m van die hek af, toe een van die mans hom oorval. Ons vermoed in dié stadium hy was bewusteloos gewees. ʼn Ander man het by die huis ingehardloop en my ma in die kombuis oorval. Een van die mans het toe my pa by die huis ingesleep en hulle begin martel.”

Volgens Cooks het die aanvallers sy ouers ure lank gemartel en aangedring op kontant. Hy het gesê daar was egter geen kontant in die huis buiten ʼn paar honderd rand in sy pa se beursie nie.

“Hulle het water gekook, olie op die stoof warm gemaak en my pa daarmee gebrand. Hulle het onder meer die olie op sy gesig en rug uitgegiet, en dit het diep blase gebrand. Daar is ook erge brandwonde aan die kant van sy been. Hulle het verder ook plastiek gesmelt en dit oor my ma se borste en maag gedrup sodat dit haar kon stukkend brand. Dit was ongelooflik wreed, en dis net ondenkbaar dat ʼn mens ʼn ander mens so kan martel,” het Cooks vroeër gesê.


Enjoyed this post? Share it!