Bejaarde boervrou word gedreig met verkagting ten tye van plaasaanval te Witrivier

ʼn Aanvaller het Sondagaand gedreig om ʼn 66-jarige vrou op ʼn plaas in die Witrivier-gebied in Mpumalanga te verkrag voordat sy makker hom oortuig het om dit nie te doen nie.

Dian Pretorius, voorsitter van die plaaslike AfriForum-tak, het aan Maroela Media gesê die vrou woon alleen in die huis op die plaas. Volgens Pretorius het twee aanvallers houtstompe gebruik om die elektriese heining op te lig en sodoende toegang tot die erf te verkry.

“Die vrou het twee honde op die erf, maar hulle is glad nie aggressief nie. Die honde het omstreeks 20:00 aan die deur van die huis gekrap om in te kom en toe die vrou vir hulle die deur oopmaak, het die twee aanvallers saam met die honde by die huis ingestap.”

Pretorius het gesê die aanvallers, waarvan een met ʼn pistool gewapen was, het die vrou vasgebind voordat hulle hul tyd geneem het om deur die huis te gaan. “Hulle was baie rustig en het hulself sommer gehelp aan die kos in die yskas en gesit en eet. Hulle het hul tyd gevat om die huis te deursoek. Ons probeer nog vasstel wat alles gesteel is, maar die vrou het vir ons gesê hulle is met sakke goed daar weg,” het hy gesê.

Pretorius het gesê toe die aanvallers op pad uit is by die deur, het een teruggedraai en vir die vrou gesê hy gaan haar verkrag. Sy makker het egter vir hom gesê om dit eerder te los sodat hulle hulself uit die voete kan maak en die twee het toe gevlug.

Die vrou kon glo later daarin slaag om haarself los te wikkel en het na haar buurman gehardloop vir hulp. Lede van AfriForum en die polisie was kort daarna op die toneel.

Die provinsiale polisiewoordvoerder kon nie vir kommentaar bereik word nie.

Deur: Maroela Media


Enjoyed this post? Share it!