Bejaarde egpaar van Port Elizabeth word wreedaardig aangerand tydens huisroof

Die gemeenskap van Schoenmakerskop in Port Elizabeth is geskok nadat ’n bejaarde egpaar Dinsdag in die middernagtelike ure in hul huis in Marinerylaan in ’n huisroof wreed aangerand is.

Volgens ’n woordvoerder van die polisie, kol. Priscilla Naidu, is die 76-jarige man op die toneel dood nadat hy in die gesig geskiet is.

Sy lewensmaat, Elaine Allwright (78), is ernstig aangerand en in ’n plaaslike hospitaal opgeneem.

Die oorledene se identiteit kan nog nie bekend gemaak word nie omdat die polisie nog probeer om sy naasbestaandes op te spoor.

“Ons is nog nie seker presies wat gebeur het nie omdat die vrou in ’n kritieke toestand in die hospitaal is,” sê Naidu.

“In hierdie stadium is dit ook nie bekend wat alles uit die huis geneem is nie, maar die polisie ondersoek ’n saak van moord en roof,” sê sy.

Retha Taylor, die egpaar se buurvrou en ook ’n lid van die buurtwag, is in ’n erge toestand oor die voorval. Sy is een van die mense wat die oorledene se bebloede lyk gesien het.

“Dit was regtig ’n wrede moord,” sê sy terwyl sy haar kop moedeloos skud.

Volgens Taylor, ’n voormalige polisievrou, het Allwright se ander buurvrou haar kort ná middernag gebel en geskreeu: “Here, kom help, Elaine is aangeval!”

Taylor sê Allwright het deur haar kamervenster ontsnap terwyl die rowers nog in die huis doenig was en toe by dié buurvrou om hulp aangeklop.

Toe ons by die agterdeur kom, het ek net sy bene gesien waar hy in die kombuis gelê het.

“Dit was ’n verskriklike gesig om te aanskou. Daar was ’n hou op haar kop en die bloed het teen haar gesig afgestroom.

“Ek het net gedink: Here, ek kan nie glo die vrou lyk so nie.

“Sy het net aanhoudend gesê sy is bekommerd oor (die oorledene) en sy weet nie wat hulle met hom gedoen het nie.”

Taylor sê sy en ’n Atlas-veiligheidsbeampte, wat intussen opgedaag het, het oor die muur gespring om te gaan kyk waar die oorledene is.

“Toe ons by die agterdeur kom, het ek net sy bene gesien waar hy in die kombuis gelê het. Die veiligheidsbeampte het gesê ek moenie by die huis ingaan nie, hy dink nie die man het dit gemaak nie.

“Elaine se kamervenster was ook vol bloed.”

Taylor beskryf die oorledene as iemand wat altyd daar was vir ander.

“Hy was baie betrokke by die gemeenskap, veral by die tennis. Hy het ook elke keer ons jaarlikse partytjies gereël.

Hy was iemand wat iets vir die gemeenskap beteken het.”

Sy voeg by: “Misdaad het die laaste paar maande so toegeneem hier op Schoenmakerskop. Ons bly in ’n wonderlike plek, maar elkeen moet meer paraat wees en hul veiligheidsmaatreëls opskerp.”

Volgens Monty Montgomery, Atlas Security se bedryfshoof, het hulle ’n noodoproep van die slagoffers se bure ontvang oor ’n moontlike huisbraak wat aan die gang is.

“Ons beamptes het daarop gereageer en was eerste op die toneel, waar ons gesien het dat die agterdeur oopgedwing is. Hulle het die oorledene in die kombuis aangetref,” sê Montgomery.

Hy sê reëlings is getref om Allwright so gou as moontlik by ’n hospitaal te kry, terwyl die veiligheidsbeamptes na die rowers begin soek het. Die hele huis se inhoud is glo omgekeer soos daar na waardevolle besittings gesoek is.

Montgomery het die voorval ten sterkste gekritiseer en sê gewelddadige huisrowe neem toe teen ’n kommerwekkende tempo in die Nelson Mandelabaai-metro.

“Die laaste paar weke het rooftogte drasties toegeneem. Dit is nie net Port Elizabeth nie, maar ook Uitenhage en Despatch wat deurloop.

“Iets daadwerkliks sal nou gedoen moet word om dit te bekamp. Ons kan nie langer reaktief wees nie, ons moet proaktief dink. Die verantwoordelikheid is op elkeen van ons om die probleem in bedwang te kry.”

Deur: Netwerk 24


Enjoyed this post? Share it!