Bejaarde vrou oorleef derde roof

’n Bejaarde vrou van Reddersburg het wonderbaarlik ontkom aan ‘n derde rooftog in haar huis en wat op ‘n baie soortgelyke wyse as die vorige kere gepleeg is.

Mev. Rina Pretorius (86 jaar) is Sondag in die oggendure met ‘n mes aangehou en beroof, waarna haar twee aanvallers haar in die kattebak van haar motor toegesluit het.

Dit is die derde keer dat sy in die nag oorval en beroof is, en ten minste een van die verdagtes het haar verlede jaar ook aangeval. Volgens die polisie moet hy weer op 21 Julie weens die betrokke aanval op haar in die hof verskyn.

Sy kan nie onthou wanneer die eerste rooftog was nie, maar herken al die rowers se stemme, en hulle werksmetode stem baie ooreen.

Die twee rowers het mev. Pretorius in die oggendure wakker gemaak en onder andere haar bankkaart en geheime nommer geëis.

Hulle het haar in die kattebak van haar motor gestop terwyl hulle ‘n mes teen haar keel gehou het.

Haar bure oorkant die straat se honde het aanhoudend geblaf en dit het die egpaar beweeg om ondersoek te gaan instel wat aangaan.

Hulle het haar uit die kattebak van haar motor gered. Sy is gelukkig nie beseer nie.

Die inligting wat mev. Pretorius verskaf het, het die polisie gehelp om een van die mans (wat haar ook verlede jaar aangeval het) enkele ure na die aanval aan te keer.

Hy het die polisie gewys waar hulle haar motorsleutels weggegooi het en wie sy makker is.

Hulle sal na verwagting vandag in die landdroshof op die dorp verskyn.

Mevrou Pretorius se dogter, Annamarie O’Halloran (41 jaar) is in 2008 op Reddersburg vermoor.

 Bron: Vryburger


Enjoyed this post? Share it!