Betogende groepe gryp mekaar amper by SABC

Die humeure het sommer gister vuurwarm opgevlam toe betogende lede van die Suid-Afrikaanse Kommuniste Party (SAKP) saam met verskeie drukgroepe teen ondersteuners van die uitsaaier se bedryfshoof, Hlaudi Motsoeneng, te staan gekom het.

Terwyl die adjunk sekretaris-generaal van die SAKP nog besig was om betogers by die SABC-gebou in Johannesburg toe te spreek het ‘n groep Hlaudi-ondersteuners opgedaag. Hulle het op ‘n trom geslaan en plakkate rondgeswaai waarop staan: “You touch Hlaudi you touch SA artists”, SABC is better than before” en “No to SABC capture. Hands off Hlaudi.”

Sake het rooiwarm geraak toe die onderskeie groepe mekaar uitgejou en nader aan mekaar begin staan het terwyl ‘n geskreeury oor en weer aan gang was. Die Johannesburgse metropolisie moes toe inspring om hulle uitmekaar te hou.

Die SAKP het nou op dieselfde wa gespring as die ANC, wat omtrent ‘n U-draai op ‘n snelweg gemaak het oor sy standpunt omtrent die toepassing van sensuur by die SABC.

Getrou aan sy radikale aard eis die SAKP dat daar binne sewe dae van Motsoeneng ontslae geraak moet word.

Net soos sy ANC-bondgenoot bevraagteken die SAKP nou skielik die bekwaamheid van die SABC-bestuur, en spesifiek die raad wat glo aandadig is in die verrotting wat besig is om by die uitsaaier plaas te vind.

Bron: Vryburger


Enjoyed this post? Share it!