Betoging langs N2: rubberkoeëls, traanrook, vlamme

Grabouw betogingBetoging langs N2: rubberkoeëls, traanrook, vlamme

Kaapstad. – Die toetssentrum van Grabouw se verkeersdepartement is Dinsdag aan die brand gesteek toe sowat 1 000 inwoners oor behuising betoog het.

Die N2 tussen Sir Lowryspas-weg en die Houwhoekpas was ook heeldag gesluit en motoriste moes alternatiewe roetes gebruik.

“Die enigste manier om by Grabouw uit te kom, was om oor die Franschhoekpas te ry,” het Kenny Africa, Wes-Kaapse verkeershoof, gesê.

Die betogers het verlede maand hutte op ’n oop stuk grond langs die N2 by Grabouw opgerig.

Hulle het aan Lulama Zenzile, ’n fotograaf van Die Burger, gesê die nasionale departement van vervoer en openbare werke, aan wie die grond behoort, het nou gesê hulle moet trek.

Die departement het nie teen druktyd op navrae gereageer nie.

Teen 15:30 Dinsdag het die polisie die hutte begin afbreek.

Die polisie het terselfdertyd traanrook en rubberkoeëls gebruik om die betogers uiteen te dryf. Die betogings het Maandagaand begin toe inwoners motorbande, rommel en bome aan die brand gesteek het.

Zelmarie Botes het op Die Burger se Facebook-blad gesê haar motor is Maandag omstreeks 21:00 op die pad met klippe bestook en die voorruit stukkend gegooi. Sy moes oor die klippe in die pad ry. Sy het die ervaring as verskriklik beskryf.

Intussen kon leerlinge van drie hoërskole en twee laerskole ook nie Dinsdag skool toe gaan nie weens die betogings.

Debbie Schäfer, Wes-Kaapse minister van onderwys, het die betogings in ’n verklaring sterk veroordeel.

“Die Junie-eksamens vir matrikulante is om die draai en ek gaan geen onwettige optrede wat tot die sluiting van skole lei, verdra nie,” het sy in die verklaring gesê.

Vier mense is op aanklag van openbare geweld in hegtenis geneem. Hulle sal binnekort in die hof verskyn, het konst. Noloyiso Rwexana, ’n polisiewoordvoerder, gesê.

  • Sir Lowryspasweg, tussen die N2 en Reservoirweg, was Maandag byna die heeldag gesluit nadat inwoners van die dorp Sir Lowry’s Pass reeds Sondagoggend vroeg oor behuising begin betoog het. – Netwerk24

Enjoyed this post? Share it!