BETOGINGS VLAM ORAL OP – Oral in die Nuus

Geweld ruk hande uit

Studente gooi Woensdag ’n rusbank in die vuur voor een van die koshuise op die kampus van die Universiteit van Wes-Kaapland. Foto: Lulama Zenzile

’n Student hardloop met ’n haelgeweer wat hy met ander studente van die Universiteit van Wes-Kaapland se hulp Woensdagmiddag by ’n sekerheidswag afgevat het. -SABC Nuus
1: Universiteit van Wes-Kaapland
Klavier, matrasse, snoekertafels brand

Studente van die UWK het Woensdag by die hoofeksamenlokaal op die kampus ingevaar en met brandblussers beskadig. Foto: Luigi Bennett
KAAPSTAD. – Oorlog woed op die kampus van die Universiteit van Wes-Kaapland (UWK).

Woensdagaand is ’n klavier, beddens, matrasse, banke en tafels uit koshuisgeboue gedra om brande op die kampus te stook.

Die kafeteria en ander eetplekke op die kampus is ook geplunder. Selfs snoekertafels is aan die brand gesteek.

Polisielede is met klippe, bakstene en bottels vanuit die koshuise bestook en het traanrook en rubberkoeëls op die betogende studente geskiet.

Ook reddingswerkers en universiteitspersoneel is aangerand.

Studenteraadslede van die UWK is ook Woensdagaand laat uit die koshuise verwyder en na ’n plek van veiligheid gebring nadat die betogers gedreig het om hulle aan te rand.

’n Sekerheidswag se pomp­aksie-haelgeweer is vroeër die middag by hom afgeneem toe ’n groep studente hom omsingel het. Twee sekerheidswagte is vir beenbreuke behandel.

Die studentebetoging wat Woensdagoggend begin het toe eksamenlokale beset is, het handuit geruk en het Woensdagaand ontaard in ’n mini-oorlog op die kampus.

Dit is moontlik die ernstigste voorval van geweldpleging in die kampus-onrus wat die afgelope maande op kampusse landwyd losgebars het.-netwerk 24

DIE UWK IS NOU MIDDE-IN MOONTLIK DIE ERGSTE GEWELDPLEGING IN SY GESKIEDENIS VAN VYF DEKADES.
Waar die onrus die afgelope dae elders in SA grootliks tot bedaring gekom het en eindeksamens op dreef gekom het, is die UWK nou ’n midde-in moontlik die ergste geweldpleging in sy geskiedenis van vyf dekades.

Volgens konst. Noloyiso Rwe­xana, ’n polisiewoordvoerder, is 15 studente in hegtenis geneem, van wie vyf deur aanklagte van aanranding met die doel om ernstig te beseer in die gesig gestaar word en tien van openbare geweld aangekla is.

Vyf studente het Brandon Clark (41), ’n brand- en mediese beampte van die universiteit, aangerand en met ’n brandblusser oor die kop geslaan.

Verskeie geboue, waaronder dié van lewenswetenskappe, sosiale wetenskappe en openbare gesondheid, is erg beskadig.

Die universiteit se hoofeksamenlokaal was teen middagete Woensdag heeltemal onbegaanbaar nadat dit met brandblussers beskadig is.

Benewens die twee eksamensessies om 12:30 en 16:30 wat Woensdag noodgedwonge gekanselleer moes word, is al die eksamens van vandag tot Saterdag ook uitgestel.

Van die gekanselleerde eksamens sal op 1 Desember geskryf word.

Onlustepolisie en sekerheidswagte se pogings om die orde op die kampus te herstel was tevergeefs en ’n kat-en-muis-speletjie het uiteindelik ontstaan, met betogers wat die polisie glo met water gespuit en oor dakke geklouter het om die polisie met bakstene te bestook.

’n Sekerheidswag is oorval en aangerand, waarna studente met sy geweer en ’n boks rubber­koeëls weggehardloop het.

Tyrone Pretorius, rektor van die UWK, het Woensdag gesê lede van die skoonmaakpersoneel het ook aan die betoging deelneem. “Dit maak die situasie ingewikkeld.”

Volgens Luthando Tyhalibongo, UWK-woordvoerder, is studente en personeellede Woensdagoggend reeds deur betogers met klippe gegooi en geïntimideer.

Van die betogers het ook klapmusse gedra en was met sambokke, bakstene en knopkieries gewapen.

“ ’n Vroulike sekerheidswag is ook aangerand en met ’n mes gedreig.”

Die reddingsbeampte wat aangeval is se vrou, Chantal Clark, het Woensdag aan Die Burger gesê haar man sterk tans by die huis aan nadat hy Woensdagmiddag uit die hospitaal ontslaan is.

Benewens beserings aan sy nek, rug en ribbes en snye aan sy kop en gesig, word hy ook vir moontlike harsingskudding dopgehou.

Clark het Woensdagoggend na ’n koshuis op die kampus gegaan toe betogers die brandalarms geaktiveer het.

Hy is met sy aankoms deur ’n groep van nagenoeg 15 mense aangerand.

Volgens Chantal is hy met ’n brandblusser oor die kop geslaan.

“Dit is moeilik. My man is al drie weke lank in die voorste linies om studente en personeel veilig te hou. Nou is hy die een wat aangerand en beseer is,” het sy vrou gesê.

Tyhalibongo kon nie by navraag sê hoeveel studente en watter vakke se eksamens ontwrig is nie.

Doreen Februarie van Kuilsrivier, die ma van een van die betogers wat Woensdagmiddag in hegtenis geneem is, het teen Woensdagaand nog nie haar seun gesien nie.

Sy en haar dogter, Astridt , het teen 19:00 nog by die Bellville Suid-polisiekantoor gewag om Msingathi Kulo te sien. – Die Burger

2: Buite die parlement
Nehawu-leiers ‘sal ook betoog by parlement’

Die polisie en die parlement se Nehawu-lede pak mekaar Woensdag op die trappe van die Nasionale Raad van Provinsies in Kaapstad.
KAAPSTAD. – As die reëls van ’n instelling soos die parlement verbrand moet word, wat kan ons vir die res van Suid-Afrika verwag?

Dít was Woensdag die vraag wat Gengezi Mgidlana op ’n nuuskonferensie gevra het waar hy aangekondig het dat die parlement ’n interdik teen stakende lede van die parlement se personeel verkry het.

Traanrook is op die oproeriges geskiet. Twee Nehawu-lede is tydens die skermutselings met die onlustepolisie Woensdagmiddag in hegtenis geneem. Daar was veel minder polisielede as oproeriges.
Ingevolge die interdik, wat deur waarnemende regter Portia Nkutha-Nkontwana in die Kaapstadse arbeidshof toegeken is, word lede van Nehawu onder meer verbied om die besigheid van die parlement te ontwrig, om by komitees in te meng of om op die parlementêre perseel te betoog.

“Ons hoop dat lede van Nehawu, as wetsgehoorsame burgers, die leiding van die hof in dié verband sal volg.”

Dit het gevolg op ’n dramatiese dag waarin lede van die polisie in onlustedrag skokgranate gebruik het in ’n mislukte poging om die stakende werkers van die parlementêre perseel te verwyder.

Die parlement het betogende werkers Woensdag gewaarsku dat ’n interdik wat hulle verbied om op die perseel te betoog moontlik gebruik sal word.
Ten spyte van die interdik het Nehawu se nasionale leiers onderneem om vandag saam met werkers by die parlement te betoog.

Teen Woensdagaand was die vakbond steeds met die bestuur van die parlement om die onderhandelingstafel.

Zolo Saphatha, nasionale adjunksekretaris-generaal van Nehawu, het by navraag sy skok uitgespreek oor hoe die Nehawu-werkers Woensdag by die parlement behandel is.

Ook die vakverbond Cosatu, waarvan Nehawu ’n filiaal is, het die gebeure skerp veroordeel en die geweld as onnodig bestempel.

“Dit is onaanvaarbaar dat ’n instelling wat die land se wette moet maak, versuim om wetlike ooreenkomste na te kom.”

Mgidlana het Woensdag bevestig die besluit om die polisie te ontbied om stakers te verwyder is deur Baleka Mbete, speaker van die Nasionale Vergadering, en Thandi Modise, voorsitter van die Nasionale Raad van Provinsies, geneem.

Mgidlana het voet by stuk gehou dat Nehawu die ooreenkoms wat hy met die parlement in Maart 2015 geteken het, verbreek het. Dié ooreenkoms is volgens hom vir twee jaar geldig voordat die vakbond nuwe eise mag stel.

Werknemers hou vol dat die ooreenkoms tans voorsiening maak vir ’n berekening van pre­stasiebonusse as ’n persentasie van hul jaarlikse salaris – Due Burger

3: Universiteit van Kaapstad

’n Jammie-bus is Woensdag op die kampus van die Universiteit van Kaapstad uitgebrand.
Bus brand
By die Universiteit van Kaapstad is ’n leë Jammie-bus Woensdagoggend met ’n petrolbom bestook en heeltemal uitgebrand. Dit is onbekend wie vir die voorval verantwoordelik is. Niemand is beseer nie. – netwerk 24
4: Op die N2

‘ n Groep betogers staan Woensdagoggend in Ou Faure-weg naby die Driftsands-natuurreservaat waar hulle ’n gedeelte van die pad met brandende motorbande versper het. Die pad is omstreeks 06:00 toegemaak. JP Smith, Kaapstadse burgemeesterskomiteelid vir veiligheid en sekuriteit, het gesê dit is steeds onbekend hoekom hulle betoog het. “In die meeste gevalle is dit betogings waar mense net eiendomme beskadig en paaie versper, maar nie hul griewe bekend maak nie. Dit maak die betoging doelloos en hulle bereik niks daarmee nie.” Hy het gesê die pad was net vir ’n kort rukkie gesluit vir verkeer. Betogers het aan Die Burger gesê hulle is ontevrede oor dienslewering
UWK-betogers maak amok op kampus
Leiers betoog saam by parlement ondanks interdik
Petrolbom na UK-bus gegooi – netwerk 24

Die kampus van die Universiteit van Wes-Kaapland is verlate na gister se geweldadige protesoptrede. Die polisie en sekerheidswagte monitor die situasie. Intussen verskyn sestien studente in die Bellville Landdroshof. Vyf op aanklag van aanranding met die doel om ernstig te beseer en elf vir openbare geweld, brandstigting en opsetlike saakbeskadiging. Die rektor, Tyrone Pretorius sê bestuur vergader vandag om te besin hoe die finale eksamen sal kan voortgaan nadat dit vroeër opgeskort is. Pretorius het beskuldigings verwerp dat gister se geweld weens sy skynbare onwilligheid om met die betogende studente te ontmoet, ontketen is. Hy sê die studente se eise is so onrealisties dat onderhandelings ‘n dooie punt bereik het. Hulle eis onder meer dat opgehoopte skuld van 270 miljoen rand afgeskryf word. Pretorius sê dit is ‘n kwessie waarmee die presidensiële taakspan besig is, maar die studente eis dat die tersiêre instelling dit moet hanteer. – RSG

Enjoyed this post? Share it!