Black First Land First betoog – ABSA moet apartheidsgeld terugbetaal

Ondersteuners van die Black First Land First (BLF)-beweging het aangedui dat hulle Woensdag by verskeie Absa-takke in Gauteng gaan betoog om aan te dring dat die bank die sogenaamde “apartheidsgeld” terugbetaal.

Dit volg nadat adv. Busisiwe Mkhwebane, die openbare beskermer (OB), bevind het dat Absa, voorheen Bankorp, tussen 1985 en 1995 ʼn onwettige reddingsboei van die Suid-Afrikaanse Reserwebank ontvang het. Sy het die verslag verlede Maandag tydens ʼn mediakonferensie in Pretoria bekend gemaak en het aanbeveel dat R1,125 miljard deur die Spesiale Ondersoekeenheid van Absa verhaal word.

Mkhwebane het verder in die verslag aanbeveel dat die Grondwet ook gewysig word sodat die hoofdoel van die Reserwebank sal wees om die sosio-ekonomiese welstand van landsburgers te beskerm.

Sy het voorts gesê die Reserwebank en die parlement moet gereeld vergader sodat daar betekenisvolle sosio-ekonomiese transformasie bewerkstellig kan word. Die OB het die Reserwebank gekap omdat sy reken hulle het versuim om die geld van Absa te verhaal.

Absa het kort daarna aangedui die bank handhaaf sy mening dat hy geen verpligting het om enigiets aan die Suid-Afrikaanse regering terug te betaal nie.

“BLF begin vandag sy pay back the money-protesaksie in Gauteng. Betogings sal by meer as 20 Absa-takke in die provinsie gehou word,” het Zanele Lwana, die beweging se nasionale woordvoerder, in ʼn verklaring gesê.

“Die vreedsame betogings se doel is om bewusmaking te skep oor die korrupsie en arrogansie van Absa-bank.”

Lwana het gesê ná die OB se bevinding het die beweging ʼn brief aan Absa geskryf en aangedring dat die geld so gou as moontlik terugbetaal word. “Absa weier egter om aan die OB se bevinding gehoor te gee wat BLF noop om protesaksies van stapel te stuur wat later sal eskaleer tot ʼn nasionale staking by alle Absa-takke.”


 

Enjoyed this post? Share it!