Bloedvete word in parlement besleg

EFF-uitgegooi“Die beeld van Suid-Afrika se parlement is aan flarde. Die vlak van debatvoering en die interaksie tussen parlementslede en -partye was nog nooit so laag as tans nie.”

Só het die VF Plus se hoofsweep, dr. Corné Mulder, hom uitgelaat oor die situasie in die parlement wat hy voorts beskryf het as ‘n “onderwerp van openbare bespotting”.

Hy het dit gelê voor die deur van “ʼn bloedvete tussen die ANC-regering en die ware ANC-jeugliga wat gedrapeer in rooi en onder die naam EFF in die parlement sit”.

Hy het tydens die parlement se begrotingsrede gesê die EFF het dit in 2014 baie duidelik gemaak dat dit hul doelstelling is om revolusie na die parlement te bring.

In hierdie revolusie wil die EFF ontslae raak van president Jacob Zuma en die ANC oorwin, terwyl die ANC weer met mag en mening daarteen wal gooi.

“Hierdie vete word gevoer sonder inagneming van waarheid, wet, Grondwet, parlement, Suid-Afrika of die eed wat elkeen van hulle afgelê het”, het dr. Mulder gesê.

“Die ANC-lede in hierdie parlement het twee keer gestem om pres. Zuma te beskerm, twee keer gestem om die Openbare Beskermer se opdragte te minag. In die proses is wet en Grondwet geminag.”

In die lig hiervan het hy dit as vermetel van ANC-parlementlede beskryf om aan te voer dat die parlement in sy pligsnakoming versuim het. Maar dit gestel dat dit eerder die meerderheid van die ANC-lede in die parlemenent is wat klaaglik gefaal het, want nie ‘n enkele een het hom (of haar) teen die vergrype uitgespreek nie.

Hy het voorspel dat die bloedvete tussen die twee politieke partye sal voortduur, en die publiek die uiteindelike oordeel sal vel.

Foto – EFF-lede word uit die parlement gegooi 

Bron: Vryburger

Enjoyed this post? Share it!