Boer se vrou verkrag, geskiet oor pen

Boer se vrou verkrag, geskiet oor pen

Suster getuig oor aanval wat egpaar eis


. plaasmoorde3-275x275

’n Boer is doodgeskiet en sy vrou om die beurt deur drie mans verkrag en toe geskiet omdat sy nie ’n pen gehad het om ’n tjek vir hulle uit te skryf nie.

Só het die vrou se suster, Evodia Tsiloane, ’n stenograaf van Botshabelo buite Bloemfontein, in trane in die Vrystaatse hooggeregshof getuig.

Haar suster, Loryn Tsiloane (34), het voor haar dood aan haar vertel wat die nag van 6 Mei verlede jaar op hul plaas, Craigmont, in die distrik Dewetsdorp met haar en haar man, Andrew Monakane (39), gebeur het.

Ismael Mofosi (35), Teboho Khoantle (31) en Papikie Pi­tseng (32) het op aanklagte van moord op die egpaar en roof met verswarende omstandighede skuld ontken.

Evodia Tsiloane het voor regter Mojalefa Rampai getuig haar suster en swaer is deur drie mans oorval.

Tsiloane het gesê enkele ure ná die aanval kon sy nie glo dit is haar suster wat in ’n hospitaalbed lê nie.

“Daar was baie bloed. Die aanvallers het haar in haar gesig geskiet. Ek kon nie haar kakebeen sien nie. Dit kon nie my suster gewees het nie,” het sy vertel.

Tsiloane het gesê ná Loryn se operasie om haar kakebeen te herstel het sy vertel hoe die voorval ontvou het.

Sy het gesê haar suster het drie mans buite die huis gewaar. Hulle het die egpaar oorval en in die huis gedwing.

Hier het die mans geld geëis, maar was ontevrede omdat daar net R7 000 kontant in die huis was.

Hulle het toe ’n tjekboek gesien en gesê sy moet ’n tjek aan hulle uitskryf en onderteken.

Daarna het hulle die egpaar van mekaar geskei. Loryn is na die kombuis geneem en Andrew na die slaapkamer van hul negejarige dogtertjie.

Die meisietjie het dié aand by haar ouma geslaap, het Tsiloane gesê.

Toe Loryn nie ’n pen kry wat kon skryf nie, het een van die mans Andrew geskiet.

Hulle het Loryn na die hoofslaapkamer gebring.

“ HIER HET DIE MANS GELD GEËIS. ”
Daar het hulle ’n vuurwapen teen haar kop gehou terwyl sy om die beurt verkrag is.

Ná dié aanval het sy hulle gesmeek om haar nie te skiet nie, maar een van die mans het haar toe in die gesig gewond, het Tsiloane gesê.

“My suster het gemaak asof sy dood is totdat die mans die plaas verlaat het.”

Loryn het haar man se naam geroep en hom probeer wakker skud, maar hy het nie gereageer nie.

Daarna het sy na hul bure se plaas gehardloop en die polisie en nooddienste ontbied.

Andrew is op die toneel dood verklaar.

Loryn is drie dae nadat sy uit die hospitaal ontslaan is, op 16 Mei, weens die skietwond dood.

Tsiloane het van die egpaar se geroofde ware, wat in Mo­fosi se huis gekry is, uitgeken.

Die mans het ontken dat hulle op die plaas was en die egpaar aangerand, beroof en vermoor het.

Adv. Colin Steyn kla aan. Adv. Belinda Daffue tree vir Mofosi en Khoantle op. Pi­tseng neem sy eie verdediging waar. – News24
Foto ter illustrasie

Enjoyed this post? Share it!