Boer van Hoedspruit word doodgeskiet tydens plaasaanval

Die polisie in Hoedspruit in Limpopo is op soek na drie verdagtes nadat ʼn boer Sondagaand in dié omgewing op sy plaas doodgeskiet is.

Lt.kol. Moatshe Ngoepe, woordvoerder van die polisie, het gesê Christo Redelinghuys (60) en sy dogter het glo omstreeks 20:30 na buite gegaan om ʼn hek te sluit. Redelinghuys en sy dogter het met hul terugkeer na die huis drie gewapende mans gewaar.

“Toe Redelinghuys vra wat hulle wil hê, het hulle hom sonder antwoord net doodgeskiet. Sy dogter het die aanval ongedeerd oorleef.” Maroela Media verneem dat Redelinghuys met mango’s geboer het.

Die motief vir die aanval is volgens Ngoepe in die stadium nog onbekend. “Ons kan ook nog nie in die stadium sê of iets tydens die voorval gesteel is nie. Die ondersoek sal dit bepaal.”

Niemand is nog in verband met die voorval in hegtenis geneem nie. Enigiemand met inligting oor die voorval kan hul naaste polisiekantoor in kennis stel of 0860010111 skakel.

ʼn Saak van moord word ondersoek.

Deur: Maroela Media


Enjoyed this post? Share it!