Boer van Machadodorp, Mpumalanga sterf ná hoekyster-aanval

Opvolg berig: Dries Schoeman (70) wat op 21 Junie drie keer met ’n hoekyster op sy plaas naby Machadodorp, Mpumalanga, oor die kop geslaan is, is Sondagoggend dood.

Frans Pieterse (43), sy skoonseun, sê sy skoonpa het Sondagoggend omstreeks 01:30 aan sy beserings beswyk.

“Hy moes Dinsdag vir ’n operasie gaan, maar toe was daar iets fout by die operasieteater. Die operasie is toe uitgestel na Donderdag, maar dit het toe ook nie plaasgevind nie,” het Pieterse gesê.

Schoeman se toestand het teen Vrydag verswak, sê Pieterse.

Marius Müller, AfriForum se nasionale veiligheidskoördineerder, sê Schoeman se dood is tragies.

“Ek hoop regtig die tannie (sy vrou, Mariaan) oorleef die aanval,” sê Müller.
Mariaan (68) is tydens die plaasaanval ook met ’n hoekyster oor die kop geslaan.

Pieterse sê sy is skielik Maandag in die hospitaal opgeneem omdat sy nie woorde behoorlik kon uitspreek nie.

“Dokters het ontdek sy het ook bloeding op die brein. Sy is in die hospitaal in ’n ernstige maar stabiele toestand.”

Volgens Müller sal hulle help met berading vir die familie en hulle ondersteun in hierdie tyd.

“Ons gaan voort met buurtwag in die omgewing en gaan help om die mense in die gebied verder te beveilig.”

’n Plaaswerker, die hoofverdagte, is kort ná die aanval op die egpaar aangekeer. Dries en Mariaan was ’n nag lank met ernstige beserings aan bome in ’n bloekombos vasgebind.

Müller sê twee ander verdagtes wat na bewering die hoofverdagte gehelp het, is nog soek.

Die plaaswerker het op die plaas Schoongezicht tussen Waterval-Boven en Machadodorp gewerk voordat hy ’n maand gelede skielik verdwyn het.

Mariaan het die man glo herken toe hy haar op die dag van die aanval op die plaas oorval, met draad en skoenveters vasgebind en geld by haar geëis het.
“Hulle het die oom en tannie se huis omtrent leeg gesteel. Al wat oorgebly het, is hul kluis waarin hul vuurwapens was,” het Müller vroeër gesê.

Hy het gesê die hoekyster waarmee die egpaar aangerand is, is in die bos gevind en vir forensiese toetse gestuur.

Pieterse het vroeër gesê die aanvaller het gedreig om Dries met petrol aan die brand te steek toe hy sy vrou probeer help het.

“My skoonma het by hom gepleit om dit asseblief, asseblief nie te doen nie.”

aanval-261x300

Dries se beserings

Skakel na Oorspronlike berig: http://nuus.info/egpaar-van-mpumalange-getraumatiseer-na-wreedaardige-plaasaanval/

Bron: Netwerk 24


Enjoyed this post? Share it!