Regering gaan Self Beskikking met Boere Afrikaner Volksraad Bespreek

Die voorsitter van die Boere-Afrikanervolksraad, mnr. Andries Breytenbach, het tydens ‘n mediakonferensie gesê:

“Dit is nou die regte tyd om selfbeskikking te kry vir die Afrikanervolk” 

10(5)

Dit is al 20 jaar sedert die Afrikanervolk sy selfbeskikking verloor het. En ‘n hele geslag het al opgegroei sedertdien en daar word “daarop aangedring dat dit nou” bekom moet word, het hy benadruk tydens die vraetyd by ‘n mediakonferensie wat deur die Volksraad gehou is.

Mnr. Breytenbach het onder meer verwys na die steun wat die sanger, Steve Hofmeyr, gekry het wanneer hy “Die Stem” sing. Tydens die Innibos-kunstefees het meer as 45 000 soos een man op aandag gestaan en “Die Stem” saam met Hofmeyr gesing. Die steun wat in hierdie opsig plaaslik en oorsee onder Afrikaners geniet word, dien as ‘n goeie voorbeeld dat die tyd aangebreek het om selfbeskikking te eis, het hy aan ‘n vraesteller gesê.

Die media is deur die Boere-Afrikaner Volksraad meegedeel dat die Suid-Afrikaanse regering na meer as twee jaar gehoor gegee het aan herhaaldelike versoeke omtrent samesprekings oor die konsep van selfbeskikking vir die Afrikanervolk. Hy het die roete verduidelik wat die Volksraad gevolg het – wat onder ander ook ‘n klag by die Suid-Afrikaanse Menseregte Kommissie ingesluit het – om uiteindelik die regering te beweeg om samesprekings te voer.

Op ‘n vraag van The Citizen se joernalis oor die praktiese sy van selfbeskikking het mnr. Breytenbach geantwoord dat dit uiteindelik neerkom op territoriale selfbeskikking. Dit is noodsaaklik omdat die Afrikanervolk minder as 6% van die meer as 53 miljoen mense in die land vorm. “Geen volk kan homself onder sulke omstandighede handhaaf nie”, het hy gesê.

Of ‘n bepaalde gebied beoog word, het mnr. Breytenbach verwys na die grondopname waarmee die Volksraad Verkiesings Kommissie (VVK) besig is. Daarmee wil bepaal word watter grondeienaars wil inskakel en waar konsentrasies voorkom.

‘n Jong swart joernalis van die SABC het mnr. Breytenbach gevra wat bedoel word met verlies van die Afrikanervolk se onafhanklikheid in 1994. In antwoord hierop is die verlies van die politieke regte om self te besluit wat gebeur ten opsigte van bykans elke lewensfaset van die Afrikaners aan die vraesteller gestel. Die internasionale regte ten opsigte van selfbeskikking waarop volkere regoor die wêreld aanspraak maak, is ook toegelig.

Die aanspraak van die Afrikanervolk op selfbeskikking is in konteks gestel deur mnr. Breytenbach wat benadruk het dat dit negatief voorgestel word, maar hoegenaamd nie ‘n “ekstremistiese strewe” is nie. Die aandrang op selfbeskikking is ook nie-aggressief en nie-konfronterend het mnr. Sakkie van der Merwe, een van die Volksraadlede wat die mediakonferensie bygewoon het, gesê.

In een van die antwoorde wat mnr. Breytenbach gegee het, het hy verduidelik dat die Boere-Afrikanervolksraad hom nog altyd tot die internasionale gemeenskap kan wend indien dit nodig sou wees. In hierdie opsig geld die internasionale ooreenkomste (waarvan die Roomse Statuut een is) waartoe die Suid-Afrikaanse regering homself ook amptelik verbind het omtrent die reg tot selfbeskikking van minderhede.  “Dit is ‘n internasionale mensereg”, het hy bygevoeg.

Afhangende van die regering se ingesteldheid teenoor die konsep van selfbeskikking,  kandie samesprekings gedurende Augustus  dalk die eerste van ‘n reeks gesprekke wees, het die sekretaris van die Volksraad, mnr. Henk van de Graaf, teenoor ‘n lid van die media opgemerk. “Die Volksraad benader die komende samesprekings met ‘n oop gemoed, en hoop dat dit suksesvol sal afloop,” het hy gesê.

Nog ‘n Volksraadslid wat die verrigtinge bygewoon het, mnr. Ben Geldenhuys, het die media daarop gewys dat die “mediapak” wat beskikbaar gestel is, ook die webwerf van die Volksraad naamlik, volksraad.co.za gekry kan word.

Vanaf BAV en Die Vryburger.

Enjoyed this post? Share it!