Bure keer aanvallers voor ná plaasaanval

 Boere in die Clocolan-distrik het tot hul buurman se redding gekom toe hy, sy vrou en hul agtjarige seun deur vier aanvallers op hul plaas buite dié Oos-Vrystaatse dorp aangeval is.

Die boere het vinnig op die noodkreet gereageer en verhoed dat die aanvallers met hul buit oor die grens vlug.

Vier gewapende rowers, twee met handwapens en twee met messe, het Carl du Randt (47), wat ’n gemengde boerdery het, sy vrou, Lydia (47), en hul seun, Carl jr., Sondag omstreeks 18:10 op hul plaas, Blydschap, ingewag.

 Die Du Randts het vroeër die middag hul twee ouer seuns, Hanjo (17) en Du Toit (15), by die Hoërskool Jim Fouché in Bloemfontein, waar hulle leerlinge is, afgelaai.

Hulle het net by die huis gestop toe die rowers hulle met wapens dreig. Hulle het Du Randt se hande met handboeie vasgemaak en hulle die huis ingedwing.

Die aanvallers het geld geëis en daarop aangedring dat Du Randt die kluis oopmaak.

“Hulle het my kinders se spaargeld en ’n jaggeweer uit die kluis gevat en ons in ’n kamer toegemaak. Hulle het ander los goed, soos klere en ’n mikrogolfoond, op my bakkie gelaai en gevlug.

“My seun kon hom eerste losmaak en het die bure oor die radio geroep. Die bure het vinnig gereageer en die mans op die pad voorgekeer,” sê Du Randt.

Volgens hom het sy twee buurmanne, Frans Pieterse en Johan Botha, die pad aan weerskante vir die aanvallers versper.

Die vier booswigte, wat intussen nog drie makkers bygekry het, het uit die bakkie gespring en sonder hul buit deur die rivier oor die grens gevlug.

“Ons is dankbaar ons het niks oorgekom nie. Hulle het baie gedreig om ons te skiet omdat hulle meer geld wou hê. Hulle het gedreig om ons dood te maak.

“Ons het kalm gebly. My seun was ook kalm, maar nou is hy baie getraumatiseerd en hy wil nie alleen slaap nie,” sê Du Randt.

Hennie Vermaak, voorsitter van die Clocolan-boerevereniging, sê hulle is dankbaar die aanval het nie tot enige lewensverlies gelei nie.

Kapt. Phumelelo Dhlamini, polisiewoordvoerder, sê die ondersoek duur voort en niemand is nog in hegtenis geneem nie.

’n Klag van huisroof word ondersoek.

Bron: Network24


 

Enjoyed this post? Share it!