Departement van onderwys in Limpopo begroot R50 000 vir oprigting van 1 toilet by skole

R50 000 vir ’n toilet. Dít is wat die departement van onderwys in Limpopo begroot om ’n enkele toilet by skole op te rig.

Dié inligting is Woensdag in die hooggeregshof in Polokwane tydens die siviele verhoor oor Michael Komape (5) se dood bekend gemaak.

Michael het op 20 Januarie 2014 in ’n vervalle puttoilet by die Mahlodumela Primary School in Chebeng buite Polokwane geval. Hy het in ontlasting versmoor.

Daniel McLaren, ’n finansiële deskundige, het names die burgerregteorganisasie Section27 getuig dat ’n toilet vir R2 500 opgerig kan word.

Dit is as berekeninge van David Still, ’n siviele ingenieur, wat Maandag namens Section27 getuig het, in ag geneem word.

Die departement van onderwys sê gereeld daar is nie genoeg geld vir infrastruktuur by skole nie.

McLaren het getuig die departement van onderwys het in 2014 toe Michael dood is, R560 miljoen van sy begroting nie bestee nie.

Adv. Vincent Maleka, namens die Komapes en Section27, het McLaren gevra waaraan hy die onderbesteding van geld in die onderwysdepartement toeskryf.

McLaren het getuig dat dit meestal toe te skryf is aan swak prosesse wat gebruik word om dienste en goedere aan te skaf.

In die boekjaar van 2013-’14 het die ouditeur-generaal (OG) boonop bevind die departement van onderwys in Limpopo het R900 miljoen se onregmatige uitgawes aangegaan.

Mark Heywood, direkteur van Section27, het vroeër getuig die Mahlodumela Primary School het reeds in 2005 vir die departement van onderwys in Limpopo gevra om iets te doen omtrent die vervalle puttoilette by die skool.

Dit het op dowe ore geval. Die Komapes eis meer as R2 miljoen van die nasionale departement van onderwys en die departement van onderwys in Limpopo weens pyn en lyding weens hul seun se dood.

Adv. Simon Phaswane, namens die onderwysdepartement, het aan die hof gesê die finansiële dokumente waaroor McLaren getuig het, is eers kort voor Woensdag se hofsitting aan hom gegee. Hy het tyd nodig om vir kruisondervraging voor te berei. Maleka het gesê alle dokumente is betyds aan Phaswane gegee.

Regter Gerrit Muller het die saak tot Donderdagoggend uitgestel.


Enjoyed this post? Share it!