Dorp Muldersdrift in Gauteng loop deur onder vlaag van misdaad

Minstens tien gewapende rooftogte het die afgelope maand in die Muldersdrift-omgewing in Gauteng plaasgevind.

ʼn 15-jarige meisie het wonderbaarlik oorleef nadat sy Dinsdagaand sewe keer geskiet is by ʼn huis in die area van die Avianto-landgoed.

Jarques Treptow, eienaar van die Drift Reaction-veiligheidsmaatskappy, het gesê daar was tussen 6 Oktober en 7 November minstens tien gewelddadige rooftogte in Muldersdrift.

“Ons versoek die gemeenskap om binnenshuis te bly sodra dit donker word en om elke moontlike veiligheidsmaatreël te tref om hulself te beveilig.”

Volgens Treptow is ʼn vrou vroeër die maand erg aangerand en ʼn man in die bors geskiet tydens ʼn gewelddadige aanval in Driefontein.

ʼn Paar dae later is nog ʼn man in die bors geskiet toe hy deur drie gewapende mans oorval is. Talle voorvalle het in Driefontein, Van Wyks Restant, Steynsvlei en Nooitgedacht voorgekom.

Treptow het inwoners gemaan om seker te maak hul buiteligte wat wegwys van die huis af is in werkende toestand en aan. “Moet ook nie buitetoe gaan as jy iets hoor nie; moenie deur vensters kyk nie en maak alle vensters toe en sluit alle veiligheidshekke.”

Jaco Mulder, VF Plus-leier in Gauteng, sê die Muldersdrift-gemeenskap word al vir etlike jare deur geweldsmisdaad geteister en die polisie is nie daartoe in staat om die gemeenskap te beskerm nie.

“Muldersdrift word omring deur ʼn groot aantal informele nedersettings waar werkloosheid, armoede en misdaad hoogty vier.

“Die polisie in Gauteng beskik ook nie oor effektiewe misdaadintelligensie-vermoë om misdaad te voorkom nie,” het Mulder gesê.

Genl.maj. Anna Mateisi, polisiebevelvoerder in die Krugersdorp-groepering, het gesê die polisie werk onverpoosd om ʼn deurbraak te behaal in verband met die rooftogte in die Muldersdrift-omgewing.

Kapt. Appel Ernst, woordvoerder van die polisie, het gesê daar is bewerings dat ʼn bende in die omgewing bedrywig is, maar dat daar nie beslissende bewyse vir dié bewerings gevind kon word nie.

Deur: Maroela Media


Enjoyed this post? Share it!