Dosent ná ‘wit kokkerotte’ nog ongestraf

Vyf maande nadat ’n dosent by Unisa wit mense “kokkerotte” op sy Facebook-blad genoem het, is geen stappe nog teen hom gedoen nie.

Op 7 Januarie het Benny Morota, ’n regsdosent, op Facebook geskryf: “I hate white people and must go back wherever they come from or alternatively to hell.”

In die kommentaarafdeling onderaan sê hy, hy wag vir sy werkgewer om hom aan te kla.

’n Student van Morota het in ’n naamlose brief aan prof. Mandla ­Makhanya, visekanselier, geskryf sy is “geskok en uiters ontsteld” dat een van haar dosente sulke goed op sosiale media kwytraak.

“Ek is ’n swart mens en glo in ’n demokratiese samelewing. Ek glo nie dit is reg om rassistiese goed te sê en haatspraak te pleeg nie.”

Die brief is ook aan die dekaan van die regsfakulteit en Unisa se ombudsman gestuur.

Morota is van haat­spraak aangekla.

Die student het toe gesê dit is vir haar duidelik dat Morota nie van wit mense hou nie en dat sy nie een van sy studente sou wou wees as sy wit was nie.

Maar daar het nog gevolg.

Op 10 Januarie het Morota op Facebook geskryf: “Educated blacks have an attitude of contempt toward their own black people because the education system taught them to admire
all light skin races in the world and de­spise the African.”

Toe ene Harald Sitta wou weet of Morota ernstig is, het hy teruggekap met: “i dnt entertain white cockroach like yourself . . . i dnt understand why you interfere in my black business . . . F*ck you pink white murderer . . . Enjoy the blood wealth of our people, your time to pay with your white skin is emmenent (sic).”

Martin Ramotshela, Unisa se woordvoerder, het aan Rapport gesê die ondersoek na Morota is “in die begin­fase”.

“Dit word hanteer met die nodige sensitiwiteit, erns en dringendheid. Wanneer die universiteit alle feite oor dié kwessie vasgestel het, gaan die nodige stappe gedoen word.”

Ramotshela sê die universiteit gaan met al die partye in verbinding tree.

By navraag sê Morota aan Rapport hy haat nie wit mense nie, maar dat ’n rusie “somtyds tot rassewrywing kan lei”.

“Wat jy moet weet, is dat ek nie enige rasse haat nie. Ek haat individue wat ander mishandel.”

Morota ontken dat hy enige kommentaar as dosent gemaak het en bepleit onderskeid tussen sy professionele en persoonlike lewe.

Hy sê hy het van die kommentaar gelewer omdat ’n wit mens aanhoudend rassistiese kommentaar op elk van sy inskrywings gelewer het. Hy wou dié persoon maar net “afskrik”.

Die inskrywings is intussen van Facebook verwyder.

Bron: Netwerk 24


 

Enjoyed this post? Share it!