Dringende versoek vir ‘n parlementêre debat oor plaasaanvalle – VF

Die slagting van boere in plaasaanvalle moet stopgesit word en die VF Plus het versoek dat ʼn dringende debat in die parlement gevoer word om die aangeleentheid te bespreek, sê dr. Pieter Groenewald, leier van die VF Plus.

Dr. Groenewald het die speaker van die Nasionale Vergadering, Baleka Mbete, gister skriftelik gevra om “dringend en sonder versuim” ʼn gesprek oor plaasaanvalle en plaasmoorde toe te laat.

Hy sê die moord op vier lede van die Smuts-familie van Balfour in Mpumalanga op 15 Februarie vanjaar het die aantal moorde net in Februarie reeds tot elf laat styg. Tot gister was daar reeds dertig aanvalle, wat beteken daar vind twee aanvalle elke dag plaas hierdie maand.

“Veral kommerwekkend is die skerp toename in die aantal moorde en veral plaasaanvalle oor die laaste paar jaar, asook die brutaliteit in baie van die voorvalle. Ten spyte hiervan, het die nasionale polisiediens nie daarin geslaag om sy plig uit te voer om landelike gebiede en in die besonder die boerderygemeenskap, te beveilig nie.

“In 2016 is 70 boere in 345 plaasaanvalle vermoor. Dit is een moord sowat elke vierde dag en feitlik daagliks ʼn plaasaanval. Dit kan eenvoudig nie so voortgaan nie. Plaasaanvalle raak elke Suid-Afrikaner. Die landbousektor voorsien werk aan byna ʼn miljoen mense terwyl die sektor 6,9% bydra tot die BBP van die land.

“Daar is reeds minder as 35 000 kommersiële boerdery-eenhede oor om voedsel vir die land te produseer. Die verlies van ‘n boer, hetsy ʼn kleinhoewe- of kommersiële boer, het nie net ‘n onmiddellike direkte impak op die families van die vermoorde boer en sy of haar werknemers nie, maar dit is ‘n direkte bedreiging vir voedselsekerheid en uiteindelik die BBP van die land.

“Dit hou daarom nie net ernstige gevolge in vir die veiligheid van die land in terme van voedselsekuriteit nie, maar ook vir die stabiliteit van die arbeidsmark en ekonomiese ontwikkeling in die algemeen. Ek doen daarom ‘n beroep op die speaker om die aangeleentheid in die parlement te bespreek sodat daar op die hoogste vlak kennis geneem kan word van die noodsaaklikheid om dringend stappe te neem om hierdie groeiende tragedie af te weer,” sê dr. Groenewald.


Enjoyed this post? Share it!