EFF dreig om e-tolpoorte af te breek

 Tol hekke

Nicholous Khoza, EFF-LP, het dié belofte en dreigement Dinsdag in die debat oor die departement van vervoer se begrotingsrede in die parlement gemaak.

Dít nadat Dipuo Peters, minister van vervoer, in dieselfde debat gesê het dat die e-tolstelsel sal bly en ’n pleidooi aan Gautengse motoriste gerig het om hul e-tolrekeninge te betaal.

Peters het gesê die gebrek aan betaling van die e-tolstelsel is kommerwekkend vir die regering.

“Dit is die rede waarom ons ’n afslag van 50% op agterstallige e-tolrekenings aangebied het. Betaal asseblief jul e-tolgeld.”

Peters het gesê haar department sal ook nie ophou om die publiek op te voed oor die verbruiker-betaal-beginsel nie.

“Ons is vol vertroue dat motoriste hul e-tolrekeninge sal betaal. Dit is waarom ons die spertyd vir agterstallige e-tolgeld verleng het sodat ons die baie mense wat wil betaal, toelaat om dit te doen.”

Khoza het gesê Gautengse kiesers sal in die verkiesings van 3 Augustus wys dat die ANC-regering vir hulle oor die e-tolstelsel “gelieg het”.

“As die EFF die metro’s van Johannesburg, Tshwane en Ekurhuleni ná die verkiesings oorneem, sal ons eerste prioriteit wees om die e-tolpoorte onmiddellik te verwyder.

“Ons mense wil ook weet hoeveel Sanral teruggewin het van die miljarde rande wat gesteel is tydens die konstruksiefase van die verbetering van die snelweë waarop die e-tolstelsel opgerig is.”

Manny de Freitas, DA-LP, het gesê ’n verbeterde vervoerstelsel kan apartheid se ruimtelike beplanning verander en mense nader aan hul werkplekke bring, maar dat die e-tolstelsel nie aan hierdie doelwit voldoen nie.

“Dit word eenvormig deur Gautengse motoriste verwerp. Dit is tyd dat die stelsel geskrap word of anders gefinansier word. Die regering ignoreer die lot van Gautengse motoriste.” – Netwerk24

Enjoyed this post? Share it!