Egpaar terug op plaas na aanval

‘n Bejaarde egpaar van die Herzogville-omgewing in die Vrystaat is terug op hulle plaas nadat hulle deur drie aanvallers aangerand en beroof is.

Mnr. Giep Botha (78 jaar), ‘n afgetrede boer van die plaas Albertsrus en sy vrou, Petronella (79 jaar) is oorval kort nadat hulle van die dorp by die huis aangekom het.

Die aanvallers het Botha aangerand toe hy geweier het om die kluis oop te maak. Die aanvallers het toe ‘n hoekslyper gebruik om die kluis oop te sny. ‘n Vuurwapen en ‘n groot som geld geroof voordat hulle gevlug het.

Die egpaar het vir etlike ure vasgebind gelê voordat een van hulle daarin kon slaag om los te kom.

Hulle het hulle seun, Gielie, in Pretoria gebel, wat die polisie en vriende op die dorp geskakel het.

Vrystaat Landbou (VL) se veiligheidsplan is daarna geaktiveer, waarna die gebied afgesper is om na die aanvallers te soek.

Hulle spoor is deur die polisie en ‘n lid van VL tot by die Bultfontein-Hertzogville-teerpad gevolg.

Die Valke ondersoek die voorval.

 Bron: Vryburger


Enjoyed this post? Share it!