Einde van Afrikaanse skole verhaas

Padda

Die eintlike doel van die aanlynregistrasie vir toelating tot skole aanstaande jaar is om gouer ‘n einde aan Afrikaanse skole te maak.

 

Hierin sal Sentraal-Transvaal se provinsiale LUR, Panyaza Lesufi die voortou neem aangesien hy al ‘n geruime tyd hom daarvoor beywer om soos hy dit stel: die “ruggraat van apartheidsbeplanning en –voorregte” te breek.

 

Die voorsitter van die Federasie van Beheerliggame van Suid-Afrikaanse Skole (FEDSAS), Paul Colditz, meen dat Lesufi se doelwit baie duidelik is. Nogtans meen hy dit is nie ‘n uitgemaakte saak dat die LUR daarin gaan slaag dat leerlinge, ondanks hulle “omstandighede” by “enige skool in die provinsie” sal kan inskryf nie.

 

Volgens Colditz is FEDSAS ten gunste van die benutting van elektronika, maar dit is nie waaroor dit handel nie. Dit gaan eerder oor die wyse waarop dit gedoen of in werking gestel word en die voorwaardes waaraan dit gekoppel word.

 

Hy wys onder andere daarop dat skoolbeheerliggame die reg het om die taal- en toelatingsbeleid van hul skole te bepaal. Volgens hom is die aanlynregistrasie daarop gemik om hierdie beleidsrigtings te omseil en bloot die naaste skool aan leerlinge toe te ken. Hierdeur sal die doodsklok gouer vir Afrikaans-enkelmedium skole lui aangesien hulle geforseer sal word om ‘Engelse’ leerlinge in te neem.

 

FEDSAS vroeër bekend gemaak dat daar nadat hy met regstappe gedreig het, wysigings aan die aanlynstelsel aangebring is. Die belangrikste verandering is dat ouers nou die skool kan kies waar hulle hul kinders wil inskryf. Desondanks is daar geen waarborg dat ­ouers wel uiteindelik in staat sal wees om hul kinders by die skool van hul keuse ingeskryf sal kry nie.

 

Hierdie aanlyn-inskrywings sal tot middernag op 1 Junie gedoen kan word en is veral gemik op Graad 1 en Graad 8-leerlinge. Die administratiewe las vir die plasings sal van 24 tot 25 Julie op skole afgeskuif word en behels sogenaamde A- en B-lyste. Bron: Vryburger

 

Enjoyed this post? Share it!