Gebeurlikheidsfonds wat boere kon help in Staatsamptenare se sakke

Die ergste gevolge van die droogte lê nog vir boere voor om deur die winter te kom en daarna weer op hulle voete te kom, terwyl die ANC-bestel steeds swyg oor hulp deur die droogte tot ‘n nasionale ramp te verklaar.

Selfs al sou dit uiteindelik tot ‘n nasionale ramp verklaar word, is dit nie duidelik hoeveel geld beskikbaar gestel sal word nie.

Geld hiervoor sou uit die gebeurlikheidsfonds van die staat gekry kon word, maar dit is blykbaar verlede jaar uitgeput toe dit gebruik is om staatsamptenare se verhogings te finansier, aldus die uitvoerende direkteur van AgriSA, Omri van Zyl.

Geld uit die staatskas sal volgens hom ‘n bydrae kon lewer om verskeie probleme op te los.

Om vee deur die winter te kry, is geld nodig om voer mee te koop en na plase te vervoer.

Boere sal ook leningshulp nodig kry om in die volgende plantseisoen te kan plant. Voorts sal dit twee tot drie jaar neem vir boere wat vee verloor het om hulle kuddes te herbou.

AgriSA het ook ‘n loonsubsidie voorgestel sodat plaaswerkers hulle werk kan behou.

Hy het benadruk dat die herstelfase nou belangrik is om produsente in produksie te hou sodat voedselsekerheid verseker kan word.

Bron – Vryburger


 

Enjoyed this post? Share it!