Geheime wantrouestemming geen gegewe – wie gaan wat se en wie gaan sy hand opsteek !!

Daar is nie regtig hoop dat ‘n geheime stemming vir die mosie van wantroue teen Jacob Zuma wel gaan plaasvind na die Grondwetlike Hof se uitspraak nie.

Die Grondwetlike Hof het in ‘n eenparige beslissing bevind dat die speaker van die parlement wel by magte is om ‘n geheime stemming onder sekere omstandighede in die parlement toe te laat, maar dat die hof haar nie daaroor kan voorskryf nie. Sy moet uiteindelik self daaroor besluit.

Die leier van VF Plus, dr. Pieter Groenewald, reken dat om daardie rede die geheime stemming nie gaan plaasvind nie. “Die speaker van die parlement, Baleka Mbete, het in die verlede keer op keer gewys haar eerste prioriteit lê by die ANC en die VF Plus het daarom nie veel hoop dat sy wel ʼn geheime stemming sal toelaat om van pres. Jacob Zuma ontslae te raak nie,” sê dr. Groenewald.

Hy sê dit is nogtans insiggewend dat hoofregter Mogoeng Mogoeng belangrike rigting aan Mbete gegee het oor haar verpligtinge deur te sê sy moet toesien dat die belange van die ANC ‘gebalanseer’ moet word met die belange van die kiesers.

“Dit is ook belangrik dat parlementslede van die ANC kennis neem van die hoofregter se aanbeveling dat hulle trou gesweer het aan die Grondwet en hul amp, en nie aan die ANC nie en dat hulle daarom streng volgens hul gewete moet stem, ongeag of dit ʼn oop of geheime stemming is.”

Regter Mogoeng het daarop gewys dat ʼn algemene verkiesing die sterkste wapen is wat die publiek het om die regering tot verantwoording te roep.

Die sekretaris-generaal van die ANC, Gwede Mantashe, asook die hoofsweep van die ANC, Jackson Mtembu, het na die uitspraak gesê hulle gee nie om dat ʼn geheime stemming plaasvind nie en dat die ANC se lede nie die mosie sal steun nie.

Dr. Groenewald sê dat as hulle dan so seker is van hul saak, moet die geheime stemming toegelaat word sodat Mantashe en Mtembu se uitlatings getoets kan word.

Tydens ‘n parlementêre vraag en antwoord sessie in die parlement net na die hofuitspraak, het Zuma heel selfversekerd gesê dat hy reken hy regeer die land goed en dat ‘n geheime stemming nie nodig is nie. Hy het ook leedvermakerig gewys op sewe vorige kere dat mosies van wantroue teen hom ingestel is, maar wat telkens misluk het.


Enjoyed this post? Share it!