Gekaapte vrou deur nag nog gesoek

Steeds nie gevind nie

Daar is deur die nag gesoek na Annatjie Myburgh van die Curlews-omgewing naby Witrivier wat steeds vermis word nadat ‘n reuse soektog na haar geloods is toe sy vermoedelik by haar plaashek gekaap is.

Lede van die blitspatrollie, die polisie se lugvleuel, ‘n private helikopter en soekspanne asook boere het aanvanklik gister gehelp met die soektog na haar.

Haar selfoonsein is op ‘n stadium opgetel, maar het later afgegaan omdat die foon waarskynlik afgeskakel is of die battery doodgegaan het.

Sy is volgens die polisie deur vier gewapende mans gekaap wat met haar in haar wit Parejo met die registrasienommer, CHF 482 MP, weggery het.

Daar is na die voertuig op onder meer die hoofroetes in die Laeveld en die plantasies in die Graskop-omgewing gesoek.

Sy het nooit by die prokureursfirma op Witrivier opgedaag waar sy werk nie en haar werkgewer, Döman Weitsz-prokureurs, het haar man, Wendell, geskakel. Hy het weer ‘n veiligheidsmaatskappy gebel om op die plaas te gaan kyk wat aangaan.

Volgens mnr. Shaun Terblanche van J&M Sekuriteit het hulle op kapmesse by die hek afgekom. Hulle het ook later haar bril daar opgetel.

Bron – Vryburger


Enjoyed this post? Share it!