Haal maar die jasse en komberse uit

Die groot koue en reën is voor die deur en die Sentraal-Transvalers kan maar saam met die Wes-Kapenaars hulle sambrele en ekstra komberse uithaal.

Swaar reën word vandag in die suide van die Wes-Kaap verwag, wat Dinsdag na die Skiereiland, Kaapse Wynland en die Weskus sal versprei.

Vandag word bewolkte weer oor die Skiereiland, die Paarl en Grabou verwag met reën en donderweer wat in die middag kan uitsak.

Ligte sneeu is Saterdag hoog teen die berge in die Ceres-omgewing en Groot Swartberge opgemerk.

Teen Dinsdag kan dit verder wes versprei met sneeu wat in die suidelike Wes-Kaap en op die berge daar kan val en moontlik om Sutherland.

In die Oos-Kaap word sneeuval tot Maandagaand oor die oostelike hoogland verwag.

Vandag gaan dit bewolk in Sentraal-Transvaal wees en teen Dinsdag is daar ‘n 80% kans op reën in die provinsie volgens die Suid-Afrikaanse Weerdiens.

Teen Woensdag sal die reën en bewolkte toestande opklaar en dan sal die minimum temperatuur Donderdag drasties tot vriespunt en selfs onder vriespunt daal.

Sneeu word nog tot Dinsdag vir Natal voorspel, veral by Mooirivier, Ladysmith, die Middellande, Van Reenenspas, Harrismith, Bethlehem en die omliggende gebiede.

Foto: Sneeulandskap (Snow Report SA)

Bron: Vryburger


 

Enjoyed this post? Share it!