Heidelberg slagoffer wat meer as maand terug met panga aangeval is, oorlede

Pieter van Deventer (64), die man wat in November in sy huis in Heidelberg wreed met pangas aangeval is, is Dinsdagoggend in die hospitaal oorlede.

Van Deventer se dogter, Elaine, het die nuus aan Maroela Media bevestig. “My pa is gisteroggend [Dinsdag] net na 01:00 oorlede. Hy was vir 46 dae in die hospitaal aan ’n asemhalingstoestel gekoppel,” het sy gesê.

Hy is sedert die aanval in die waakeenheid van die Netcare Unie-hospitaal in Alberton behandel. Sy het gesê die familie kan nie nou al begrafnisreëlings tref nie aangesien ʼn nadoodse ondersoek uitgevoer moet word.

Maroela Media het vroeër berig Van Deventer is aangeval terwyl hy en ʼn huishulp alleen by die huis was. Sy vrou was by die werk. Pieter van Deventer, Piet se seun, het gesê die aanvaller(s) moes oor die muur bo-oor die lemmetjiesdraad geklim het.

Piet was in die eetkamer toe die aanvallers ingestorm en hom met die panga begin aanval het. “Hulle het hom op die kop en lyf geslaan. Hy het erge wonde aan sy kop; sy skedel is op drie plekke gebreek; sy kakebeen is gebreek én sy arm is heeltemal gebreek met ʼn groot vleiswond daaraan,” het Van Deventer vertel.

Volgens hom kan ʼn mens uit die aard van sy pa se beserings sien hy het terugbaklei. Die huishulp was besig om wasgoed op te hang ten tyde van die voorval. “Sy het op hulle afgekom en toe het hulle gevlug. Hulle het niks gesteel nie.”

Die huishulp het volgens Van Deventer begin skree, en die bure het aangehardloop gekom en hom gebel.

Piet is per mediese helikopter na die hospitaal gehaas. Piet het volgens Van Deventer van ʼn rolstoel gebruik gemaak as hy ver ente moes beweeg. “My pa was heeltemal kruppel weens ʼn virus wat hy vroeër opgedoen het. Jy kon hom net van die stoel af stamp en hy sou nie veel kon doen nie.”

Kapt. Thivhulawi Tshilate, woordvoerder van die polisie, het sy medelye met die familie betoon. “Ek kan bevestig niemand is nog in verband met die voorval in hegtenis geneem nie, die ondersoek duur nog voort.”


Enjoyed this post? Share it!