Het jy die nuwe Verblyfreg-wet gelees ?? – Boere vertrou nie die nuwe wet wat die ANC opgestel het nie.

Die Wysigingswetsontwerp op die Uitbreiding van Sekerheid van Verblyfreg is nie goed deurdink nie en kan baie onvoorsiene en negatiewe gevolge vir veral grondeienaars inhou, sê adv. Anton Alberts, voorsitter van die VF Plus.

Adv. Alberts het tydens die Tweede Lesingsdebat oor die Wysigingswetsontwerp gesê die gevolge raak veral duidelik wanneer ʼn mens die groter prentjie van die regering se rampspoedige grondhervormingsprogram in ag neem wat gekenmerk is deur swak uitvoering, korrupsie, vyandigheid jeens boere en die mislukking van swart toetreders.

“Een van die ernstige gebreke van die wetsontwerp is om ʼn reg aan enige persoon te gee om sy familie op enige grond te begrawe. Indien dit toegelaat word, maak dit die grondeienaar oop vir moontlike toekomstige grondeise.

“Verder, gegewe die regverdige vrese wat boere het vir plaasaanvalle en –moorde, kan hulle eenvoudig nie bekostig om vreemde grafte en mense vir begrafnisse en rituele op hulle plase toe te laat nie. Niemand in die ANC het daaraan gedink nie.

“ʼn Verdere onbedoelde gevolg is dat boere eenvoudig al hoe minder mense op hulle grond sal laat woon en boerdery sal meganiseer. Uiteindelik is die stryd nie meer een tussen boere, werkers en inwoners nie, maar tussen die werkers en robotte.

“Gegewe die onsekerheid wat boere tans het oor die eienaarskap van hul grond weens ANC-uitsprake van onteiening sonder vergoeding, kan mens ook verstaan dat hulle nie dié wetgewing sal vertrou nie.

“Daar is tóg ‘n oplossing en dit is die skep van agri-dorpe deur die regering in vennootskap met boere. Hierdie dorpe sal in staat wees om hulpbronne te skep om huise, skole, hospitale en winkels te bou en verdere werksgeleenthede te skep. Dit sal plaaswerkers in staat stel om naby hul werksplekke te woon en hul kinders sal toegang tot onderwys te hê wat sal verseker dat hulle eendag suksesvolle grondeienaars kan word,” het adv. Alberts aan die hand gedoen.


Enjoyed this post? Share it!