Hoekom ek vir en nie teen Orania is

Ek het onlangs weer die geleentheid gekry om die pragtige dorp Orania te besoek toe die gewilde Bokkieweek hier aangebied en geskiedenis gemaak is met die eerste o/21-rugbytoernooi wat hier plaasgevind het.

Bokkieweek word elke jaar ook in Kroonstad of Naboomspruit aangebied. Vanjaar was egter baie spesiaal met Orania wat as gasheer en AfriForum wat as hoofborg opgetree het.

Orania het my opnuut beïndruk met sy skoon omgewing en baie gasvrye en hardwerkende inwoners. Dit was ’n belewenis en onvergeetlike ervaring om te sien hoe 1 200 inwoners hul huise en harte oopgemaak het om 150 jong opkomende rugbyspelers welkom en tuis te laat voel.

Die propvol Bokkieweek-program het met ’n verwelkomingsdinee afgeskop met watertandlekker “ma-se-kos-geregte” wat die inwoners self voorberei het. Rugbyspanne van Griekwas, Kaveliers, Noord-Gauteng, Hoëveld, Vaaldriehoek het teen mekaar kragte gemeet. In die finale rondte het Noord-Gauteng en Hoëveld mekaar gepak met Noord-Gauteng wat as wenners uit die stryd getree het. Die nasionale o/21-span is na afloop van al die wedstryde aangekondig.

Een aand is met ’n baie spesiale Cantus afgesluit. Vir diegene wat nie weet nie: ’n Cantus is ’n moet! Ek sal dit beskryf as ’n tradisionele aand wat met lekker sang en bier gepaard gaan.

Bokkieweek het vanjaar saam met Paasfees geval. Dit was dan ook heeltemal gepas dat Goeie Vrydag met ’n kerkdiens begin is waarna die jongmense heerlik piekniek op die oewer van die Oranjerivier gehou het.

Nog ’n hoogtepunt van die week was ’n uitstappie na Magersfontein waar ons kennis van die geskiedenis bietjie afgestof is.

Ek het opnuut besef dis eintlik ’n skande dat Orania dikwels negatief en agterlik in die media uitgebeeld word. Met ’n leuse soos: ’n Seker toekoms vir ons mense, is Orania ’n klinkklare bewys van hoe suksesvol selfbeskikking werklik is. Ek kan nie sien hoe dit kan verkeerd wees as ’n gemeenskap vir hulself wil besluit en vir hul eie toekoms verantwoordelikheid aanvaar nie. Daar is baie lesse uit Orania te leer. Lesse oor hoe mense kan saamstaan, mekaar kan help en bereid is om hard te werk. Dit is mos wat ’n gemeenskap suksesvol maak. In Orania sien mens hoe mense se drome werklikheid word en hoe hulle vir hulself as Afrikaners besig is om ’n stad te bou waar hulle vry, voorspoedig en veilig kan wees.

Elke generasie is verantwoordelik vir sy eie vryheid. Ek wil ook vry wees om as jong Afrikaner my deel te doen om vir myself ’n bestaan in Afrika te verseker. Al wat ek vra, is gun ons plekke soos Orania.

 

The post Hoekom ek vir en nie teen Orania is appeared first on AfriForum.

Enjoyed this post? Share it!