Hospitaal Slagting: Babas minder as 1kg moet sterf

Welkom. Baba se dood ‘nie tevergeefs’ – Soos ander babas wat minder as 1 kg weeg, moes baba Ethan in die hospitaal se waskamer sterf.

Maar dié vegtertjie het ander planne gehad en minder as ’n maand ná sy geboorte het sy kort lewe mense se harte aangeraak en weet die hele land nou van dié wrede praktyk in staatshospitale.

Die Barnard-egpaar het in Januarie vanjaar uitgevind Cindy is swanger. Dit sou hul derde kind wees. Ben, ’n elektrisiën, het op kontrak by ’n myn gewerk, maar gesukkel om permanente werk te kry.

 Toe sy nege weke swanger was, het Cindy begin bloei. ’n Dokter in die Bongani-hospitaal op Welkom het haar aangesê om elke dag ’n aspirien te drink.

Op 20 Junie het sy sametrekkings gekry en die Barnards het ’n ambulans ontbied.

Cindy sê sy was al 26 weke swanger, maar die hospitaalpersoneel het uit die staanspoor nooit aan haar baba as ’n mens gedink nie. Daar is na ’n dreigende miskraam verwys terwyl sy die lewe aan ’n vroeggebore baba geskenk het.

Ben is die aand huis toe, want hy mag volgens die hospitaal se beleid nie by Cindy gebly het nie.

Sy het teen middernag nog in die wagkamer van die kraamafdeling gelê en alleen, sonder hulp, daar begin kraam.

Nadat baba Ethan gebore is, het ’n suster, wat haar intussen begin versorg het, gesê: “Jy kan maar vergeet van die kind.”

Dié suster het Ethan weggevat. Cindy het gedink haar kind word in ’n broeikas gesit.

Sy is in die nag oorgeplaas na die hospitaalsaal vir ma’s wie se babas dood is. Sy het geweet haar kind is dood, want dit is waarheen sy in 2013 gestoot is toe haar en Ben se eerste kind ook dood is.

Cindy is gevra om ’n toestemmingsvorm te teken dat Ethan veras mag word. Die vorm moet geteken word omdat babas van minder as 1 kg as mediese afval beskou word. Ethan het 730 g geweeg.

Sy het Ben gebel en gesê Ethan het dit nie oorleef nie, hy was te klein. Ben het net ná 07:00 by die hospitaal opgedaag.

Die egpaar het hartseer in die hospitaal se binnehof gesit en huil oor hul baba toe ’n verpleegster na hulle kom soek het. Die vrou het gesê sy moes Ethan se lyk in ’n houer plaas vir die verassing toe sy agterkom hy leef nog.

Baba Ethan is inderhaas na die neonatale waaksaal geneem. Hier het hy, byna sewe uur ná sy geboorte, die eerste keer suurstof gekry.

“Binne enkele ure is die mat behoorlik die tweede keer onder ons voete uitgeruk,” sê Ben terwyl sy oë vol trane skiet.

Hy hou Cindy se hand vas.

“Dit was die mooiste gesig om ons kind te sien en te weet hy leef. God het Ethan gestuur sodat almal kan weet wat hierdie hospitale met babas doen.”

In baba Ethan se lêer was ’n aantekening dat hy aan hipotermie (verkluiming) ly. ’n Dokter in die neonatale waaksaal het hier reguit aan die egpaar gesê babas van minder as 1 kg is nie vir die hospitaal ’n voorkeur nie.

Dit is waarom hulle Ethan gelos het om in ’n yskoue spoelkamer te sterf, sê Cindy.

Die volgende paar dae het klein Ethan versterk. ’n Vroulike dokter het volgens die Barnards alles moontlik gedoen om hul seuntjie te versorg. Hy het goed gevorder, maar bloedarmoede ontwikkel.

Die naweek van 1 Julie was die dokter wat na Ethan omgesien het nie aan diens nie. Ethan het skielik agteruit begin gaan en sy lyf het styf geword. Niemand kon aan die egpaar verduidelik waarom die seuntjie se spiere styf word nie.

Op 3 Julie het Ethan se toestand verswak. Hy is die aand oorlede, 13 dae nadat hy vir dood in ’n koue waskamer gelos is.

Toe Cindy in die gang huil, is aan Ben gesê: “Vat jou vrou huis toe, sy raas.”

Die Barnards glo Ethan het nie vergeefs gesterf nie. Hulle sal nie stilbly oor wat aan hul seun gedoen is nie. In 2013 het hulle ook ’n baba in die Bongani-hospitaal verloor. Hulle glo ook dié baba se dood was aan nalatigheid te wyte.

  • ’n Klag van strafbare manslag is teen die hospitaal ingedien en die polisie het bevestig dat die saak ondersoek word. Die provinsiale gesondheidswoordvoerder, Mondli Mvambi, het vroeër aan Rapport gesê die departement het hulle berading aangebied. Die Barnards het aan Volksblad gesê niemand het hulle enige berading aangebied nie.

Bron: Netwerk24


 

Enjoyed this post? Share it!

 
  • Grundy

    Dis moord deur al die staf aandiens maak ‘n voorbeeld van die klomp Kla hulle aan Vir moord nie nalatigheid of straf baremanslag nie dis moord beplan want die hospitaal het voor uit beplan om babas onder 2.2 lb te vemoor. MOORD
    Ek is 50 jaar oud en as Een militere hospitaal dit gedoen het is ek ook dood verklaar op 2 lb.

  • Ek

    Wat sal berading help??????? Dis moord sluit al daai gamors personeel toe vir moord. Hoe kan mense so stupid wees en wat word van die eed wat hulle af gele het? Nee wat hulle is nie die naam verpleegster of dr werd nie hulle moet van die rol geskraap word en die staat moet so gesue word dat elke government gebou verkoop moet word om hulle te probeer vergoed. Baie sterkte aan daai gesin moet dit nie daar los nie vat hulle vir alles wat hulle het!!!!

  • Denise Oosthuizen Wilshire

    Has anyone strated some sort of support for this case in court? We need to stop this satanic code of conduct now. Prosecute these people who take an oath to save lives and then do the exact opposite. Too much is swept under the carpet of lies, deciet and inhumane treatment. cANCer doing a great job of dehumanising an entire country. Turning professionals into murderers. We do not appreciate the mess that cANCer has made of our entire country. Shame on all involved with this terrible deed. How you sleep at night, I will never know. You ALL DISGUST ME TO THE CORE. EVEN ANIMALS HAVE MORE COMPASSION. That you can commit murder JUST BECAUSE WORDS ON PAPER SAY IT’S IN YOUR JOB DESCRIPTION. You and those in power have no place in DECENT SOCIETY. MAY GOD HELP AND SAVE US FROM YOUR EVIL ACTS. AMEN

  • Bertha Haasbroek

    My vriendin se baba is ook baie vroeg gebore, 750g. Gelukkig in n privaat hospitaal. Sy is nou 9 maande oud en die pragtigste klein dingetjie wat jy jou kan voorstel. Hoe kan iemand n volmaak gevormde mensie as hospitaal afval beskou??? Nee sies man, dis blatant moord xxx Sterkte vir die mamma en pappa in hierdie moeilike tyd xx