Jong fietsryers laat speke sing vir boere in nood

Boere in droogtegeteisterde gebiede het ’n goeie hupstoot gekry toe R170 000 ingesamel is deur ’n groep jong fietsryers van George wat die speke oor meer as 500 km laat sing het.

Die fietstoer van George na Worcester is van 25 tot 30 Junie onderneem deur 19 lede van Impak, ’n groep by die Hoërskool Outeniqua op George wat ten doel het om ’n verskil in die omgewing en in Suid-Afrika te maak. Dit was ten bate van Caring Daisies se projek Manna vir die Boere. Die geld is onlangs tydens ’n geselligheid by die skool aan Anria van Heerden van Caring Daisies oorhandig.

“Die Here het die projek geseën met elke kilometer wat getrap is. Daar was geen ernstige beserings of pap wiele nie,” sê Elandi Rautenbach, ’n onderwyseres wat gemoeid is met Impak.

 Die fietsryers het dorpe soos Stilbaai, Malgas, Agulhas en Caledon besoek en 525 km afgelê.

Volgens Rautenbach was daar goeie spanwerk. “Hoe die leerlinge mekaar ondersteun het, was net in ’n ander klas. Die groep kinders het nuwe betekenis aan ‘familie’ en ‘niemand bly agter nie’ gegee. Wanneer hulle mekaar teen daardie verskriklike bulte uitgestoot het, het die volwassenes ’n traantjie gepink, want so iets het hulle nog nie beleef nie. Die spreekwoord ‘as dit nie aan jou vat nie, gee jy nie genoeg nie’, het hierdie groep leerlinge elke dag uitgeleef. Die deursettingsvermoë, entoesiasme en positiwiteit wat die kinders getoon het, sal nooit in geldwaarde gemeet kan word nie.”

Rautenbach het almal bedank wat die projek ondersteun het.

Bron: Netwerk 24


 

Enjoyed this post? Share it!