Kaapse boere dankbaar vir reën

Wydverspreide reën, veral in die opvangsgebiede van die opgaardamme in die Wes-Kaap, het groot verligting gebring.

Maandag sal die kouefront van die laaste paar dae nog van Kaapstad tot bo in Springbok ’n draai gooi en vooruitsigte vir reën is tussen 30% en 60%.

Die reën is goeie nuus vir boere in die Swartland en Weskus met koring, gars, hawer, kanola en weiding, waar droë en warm weer nog tot in die eerste week in Junie die droogtetoestande uitgerek het.

 Carl Opperman, uitvoerende hoof van Agri Wes-Kaap, sê boere is baie dankbaar vir die reën wat broodnodig is. Damme begin nou weer water kry, met waterstrome wat begin afvloei het.

In die Swartland en Weskus, waar dit feitlik glad nie in Mei gereën het nie, het die nuwe wintergraan verlep. Nou is daar verligting nadat dele teen Sondagoggend goeie reën gekry het. Nog reën word vir Maandag voorspel.

Opperman sê goeie reënbuie in die berge help dat strome afloop in die rigting van Clanwilliam, Citrusdal en Ceres en damme se vlakke laat styg.

Volgens die weerkantoor is daar Maandag ’n 60%-kans vir reën in Kaapstad, die Paarl, Hermanus, Grabouw en omliggende gebiede.

Daar is ’n 30%-kans vir reën van Langebaan aan die Weskus tot bo in Springbok in die Noord-Kaap.

Oudtshoorn, George en Mosselbaai in die Suid-Kaap kan ook reën verwag.

Bron: Netwerk24


 

Enjoyed this post? Share it!