Kaapse laerskool wys Afrikaans die deur

’n Brief van die beheerliggaam aan voornemende gr.1-leerlinge se ouers lui dat die skool besluit het om van parallelmedium na enkelmedium oor te slaan weens ’n dalende aantal aansoeke van Afrikaanse leerlinge.

“Die beheerliggaam van die Laerskool Monte Vista het besluit om die skool se status as parallelmediumskool te verander na ’n enkelmediumskool. Dit beteken dat onderrig slegs in een amptelike taal plaasvind, naamlik Engels. Die Afrikaanse been van die skool sal met natuurlike verloop uitgefaseer word,” lui die brief.

 Zaneta Burger, ’n ouer van die skool wat Woensdag in kennis gestel is dat haar gr. R-kind om dié rede nie plek in die skool gekry het nie, het gesê dit laat voornemende ouers nou in ’n moeilike posisie.

“Ons moes al in Maart aansoek doen en nou is al die skole in die omgewing vol,” het sy gesê.

“Die Laerskool Panorama het reeds ’n waglys gehad, wat nou nog langer is. Dis net teleurstellend dat hulle nie lankal met ons oor hul plan om Afrikaanse klasse te beëindig gekommunikeer het nie.”

Dean Pretorius, voorsitter van die beheerliggaam, het gesê dié besluit is geheel en al op getalle gegrond.

“Dit het niks met taal te doen nie,” het hy gesê.

“Die skool kan dit eenvoudig nie meer regverdig dat die Engelse been met vol klasse sit en aansoeke moet wegwys terwyl daar baie plek in die Afrikaanse been van die skool is nie.”

Monte Vista het tans sowat 800 leerlinge, waarvan minder as ’n kwart onderrig in Afrikaans verkies.

Pretorius het gesê briewe is voorlopig aan voornemende gr. 1-ouers uitgestuur en die beheerliggaam sal Donderdagaand weer oor die besluit vergader.

Hy is ook met ander Afrikaanse skole in die omgewing in gesprek om te kyk waar leerlinge moontlik ingeneem kan word.

“Die skool sal parallelmedium bly totdat die laaste Afrikaanse leerling die skool verlaat het. Dit sal uiteraard ’n paar jaar duur,” het hy gesê – Nerwerk24


 

Enjoyed this post? Share it!