Kapers slaan op vlug toe eienaar terugveg

‘n Man van Port Elizabeth het Dinsdagaand daarin geslaag om kapers af te skrik toe hy een van hulle uit sy bewegende motor gestoot het.

Die man (62) en sy vrou het omstreeks 19:15 by hul huis in Kabegapark stilgehou. Hy het blykbaar gesukkel om sy motorhuis se deur oop te sluit, toe twee mans by die erf instap en hulp aanbied.

Hulle het ’n vuurwapen uitgehaal en hom daarmee gedreig.

“Hulle het in die man se Renault-motor geklim, maar die eienaar het ook ingeklim. Hy het met die twee mans gestoei en daarin geslaag om die bestuurder by die bewegende motor uit te stoot,” sê kol. Priscilla Naidu, ’n polisiewoordvoerder.

Die motor het teen ’n lamppaal vasgery en die kapers het sonder die motor laat spaander.

Die motoreienaar is in die proses met ’n pistool oor die kop geslaan.

Naidu sê slagoffers van misdaad moet onthou die belangrikste is om die misdaad te oorleef. “Wees versigtig om ’n kaper aan te vat, veral as hy gewapen is. Eiendom kan vervang word, maar nie lewens nie.”

Deur: Netwerk 24


Enjoyed this post? Share it!