Klippe, koeëls vlieg weer in Grabouw oor ‘inkommers’

Rubberkoeëls en klippe het Woensdag weer gevlieg in die polisie se stryd om “inkommers” van ’n stuk grond buite Grabouw te verjaag.

Die polisie en inkommers, wat volgens inwoners uit die Oos-Kaap kom, was Woensdag die tweede dag ná mekaar slaags nadat laasgenoemde onwettig op ’n stuk grond buite die dorp begin plak het. Die grond behoort na verneem word aan die departement van vervoer en openbare werke.

Die N2 in die gebied, asook skole, is weens die onrus gesluit.

Faksiegevegte binne die ANC het ook intussen die skuld vir die geweld gekry.

Daar is Dinsdag reeds begin om die strukture te verwyder, en die proses het Woensdag voortgeduur.

Die verkeersafdeling se gebou is Dinsdag afgebrand en chaotiese tonele het hulle afgespeel toe die strukture afgebreek is. Soos dit verwyder is, is die veld aan die brand gesteek en is die polisie met klippe bestook.

Die wetstoepassers het met rubberkoeëls, traanrook en skokgranate geantwoord.

Die inkommers het die N2 toegepak, takke op die pad verbrand en motors deurentyd met klippe bestook.

Die N2 was Woensdagmiddag steeds vir verkeer gesluit en so ook skole in die gebied.

Polisiebeamptes op die toneel het die geveg tussen hulle en die inkommers as ’n “kat-en-muisspeletjie” bestempel.

Die polisie kon die groep met behulp van Njala-voertuie en rubberkoeëls onder bedwang bring. Hulle is eindelik uiteengejaag en minstens sewe mense is in hegtenis geneem.

Intussen het die ANC in die Wes-Kaap die geweld veroordeel. Die ANC het gesê die “vernietiging” in Grabouw is die werk van “misdadige elemente” wat die betogings probeer uitbuit.

“Sulke verwoesting word onomwonde veroordeel,” het Faiez Jacobs, die ANC se provinsiale sekretaris, in ’n verklaring gesê.

“Die ANC veroordeel egter ook die DA-regering vir die manier waarop hy die uitsettings hanteer, veral aangesien dit nou die reënseisoen is.”

’n Bron binne die ANC, wat anoniem wou bly, het egter gesê die grondgrype is die skuld van faksies binne die ANC.

“Dit het begin toe daar kandidate vir die plaaslike verkiesing benoem is. Provinsiale leiers binne die ANC het toe die grondgrype gemobiliseer om ondersteuning te kry voor die verkiesing. Dit is die rede vir die konflik.” Bron: Netwerk24

Enjoyed this post? Share it!