Kommer oor polisie ondersoek na moord op jongman

Ernstige kommer is deur ‘n plaaslike koerant uitgespreek omtrent onder meer die polisie-ondersoek na die dood van ‘n jongman, Pierre-Etienne de Necker, op Belfast in Oos-Transvaal.

Volgens die Middelburg Observer se beriggewing het die ondersoekbeampte op daardie tydstip nog nie die bewysstukke by De Necker (24 jaar) se gesin gaan haal nie.

Hierdie bewysstukke sluit in klippe, bottels en stokke asook sy bebloede klere wat op die toneel opgetel is nadat ‘n groep van sowat 12 “woedende” swartes De Necker toegetakel het.

Hy is weens hierdie aanranding bewusteloos in die hospitaal opgeneem en het later in ‘n koma verval waaruit hy nooit gekom het nie. Hy is hierna dood weens die wreedaardige aanranding.

Die vier verdagtes wat daarna deur die polisie in hegtenis geneem is, is egter dieselfde aand weer laat gaan omdat daar glo nie genoeg bewyse teen hulle was nie.

Die koerantberig het dit as “kommerwekkend” beskryf dat daar “vier dae na mnr. De Necker se dood, nog geen persone vir sy moord aangekla is nie.”

Luidens koerantberigte was De Necker in besit van ‘n “gesteelde voertuig” en is deur swartes in ten minste vier verskillende voertuie agtervolg. Hulle het hom uiteindelik in ‘n doodloopstraat vasgekeer, uit die voertuig gepluk en begin aanrand totdat hy uiteindelik bebloed en bewusteloos was.

Volgens ooggetuies het twee polisiebeamptes met hulle hande in hulle broeksakke gestaan tydens die aanranding, aldus die berig.

Die beriggewer verwoord die bekommernis oor die ondersoek soos volg: “Persone na aan die ondersoek vrees dat swak speurwerk asook onderlinge wit-teen-swart politiek wat nou aangewakker is, die geloofwaardigheid van die Belfast-polisie in gedrang plaas.”

Die “onderlinge wit-teen-swart politiek wat nou aangewakker is” verwys na ‘n “sensasionele berig” op die webblad Censorbugbear.org waarvan die besonderhede deur die koerant nagegaan is en die akkuraatheid daarvan bevraagteken word.

Foto – Pierre-Etienne de Necker

Bron: Vryburger


Enjoyed this post? Share it!