KONFYT EN TOFFIE POEDING OP DIE STOOF

KONFYT EN TOFFIE POEDING OP DIE STOOF

stroop poeding
Vir 4 mense
In die winter het ma amper elke Sondag hierdie poeding gemaak. Dit brand maklik vas, maar soos kinders maar is, was dít selfs nog lekkerder vir ons.
Jy benodig
4 eetlepels botter
4 eetlepels suiker
4 eetlepels marmelade, of ander konfyt soos appelkoos
2 eiers geklits
250ml meel
2 teelepels koeksoda
1 koppie melk
Sous
1½ koppie melk
1½ koppie suiker
½ koppie room of ingedampte melk (Ideal Milk)
2 teelepels vanieljegeursel
Só maak jy
Room die botter en suiker tot liggeel. Voeg die konfyt en eiers by die bottermengsel. Voeg die meel bietjie vir bietjie by. Meng die koeksoda met die melk en voeg dit bietjie vir bietjie by die mengsel totdat dit goed geklits is.
Maak die sous. Meng al die bestanddele saam in ’n swartboomkastrol van ten minste 3 liter. Bring dit tot kookpunt.
Keer die bak met die beslag versigting in die middel van die kokende sous om. Moet dit glad nie roer nie. Pasop vir oorkook! Draai dadelik die hitte tot die laagste en plaas ‘n styfpassende deksel op die pot.
Kook dit vir 35 minute oor ’n baie lae hitte sonder om dit ooit te roer. Die poeding is gaar wanneer die middel amper die kleur en tekstuur van ‘n sagte malvapoeding het.
Aletta sê: Ek maak dikwels ’n gemmerweergawe van dié poeding: Vervang die marmelade met appelkooskonfyt of gouestroop. Voeg dan ook ’n eetlepel fyn gemmer by die meelmengsel en ’n stuk vars gemmer (ongeveer 2 cm), baie fyngekap, by die sous.
Resep van Weg se werf – ALETTA LINTVELT aangepas

Enjoyed this post? Share it!