Kontrak Op Thuli Madonsela se lewe

Thuli MadonselaDie Openbare Beskermer, Thuli Madonsela, het bevestig dat sy gewaarsku is oor ‘n moontlike aanslag op haar lewe. Sy het die waarskuwing deur ‘n teksboodskap van ‘n polisie-informant gekry. Madonsela sê volgens die boodskap is ‘n berugte Kaapstadse bendebaas betaal om iemand te kry om haar te vermoor. Die dreigemente volg vyf maande voor Madonsela se ampstermyn ten einde loop en nadat die Konstitusionele Hof haar verslag oor Nkandla gehandhaaf het. Madonsela se woordvoerder, Kgalalelo Masibi, sê sy het die teksboodskap na wetstoepassingsagentskappe aangestuur.

Die amptelike opposisie het intussen gesê hy sal aandring op die jongste inligting oor die ondersoek na die beweerde doodsdreigemente teen Madonsela. Die DA-woordvoerder, Zak Mbhele, sê die polisie moet die Parlement inlig wat gedoen gaan word om die veiligheid van die hoofde van Hoofstuk Nege-instellings te verseker. Mbhele sê daar kan nie toegelaat word dat dreigemente gemaak word teen die lewens van die hoofde van instellings wat van kritieke belang is vir die verdediging van die demokrasie nie. – RSG

Enjoyed this post? Share it!