Korrupsie ook in die DA?

korrupsieBeskuldigings van baantjies vir boeties en poste vir familie en vriende in die DA het die afgelope week tot in die Noord-Kaap uitgekring.

DA-aktiviste en raadslede is ontevrede oor die proses wat gevolg is in die aanwysing van kandidate vir die verkiesing in Kimberley en Phokwane (Hartswater).

In Kimberley is daar veral agterdog en “bitter ontevredenheid” omdat die vrou van Andrew Louw, DA-leier in die Noord-Kaap, en van ander minder ervare lede bo dié van meer ervare lede op die partylyste pryk.

Rapport het by twee bronne verneem ­Mariam Louw was ’n provinsiale assistentdirekteur in die departement van gesondheid, maar dat sy vroeër aansoek gedoen het om medies ongeskik verklaar te word.

 Sy beklee nou die tweede plek op die lys.

“Dis vreemd dat ’n huidige raadslid op nommer 35 lê, maar iemand wat nooit in die politiek was nie die tweede plek kry,” sê ’n DA-aktivis.

Die bekendmaking van die kandidatelys vir dié munisipaliteit en ander in die Noord-Kaap is intussen uitgestel tot môre nadat die leierskorps Vrydag op ’n mediakonferensie besef het ’n kandidaat se naam is glo op die verkeerde plek.

Die polemiek kom nadat die DA-leierskorps in Tshwane twee weke gelede opdrag gekry het om die lysproses te herhaal ná besware van raadslede wat meen hulle is onregverdig afgeskuif.

Lysprosesse veroorsaak altyd konflik omdat iemand laag op ’n party se lys ’n mindere kans staan om tot raadslid verkies te word.

Tog het die DA se proses vanjaar buitengewoon heftige kritiek ontlok.

Louw het Vrydag aan Rapport gesê hy sou die Noord-Kaapse kandidatelys vroeër die dag op ’n mediakonferensie bekendmaak, was dit nie vir die fout daarop nie.

Hy beoog om dit môre bekend te stel, hoewel sommige kandidate nog op die finale uitslag van hul appèlaansoeke wag.

Geen van die kandidate in Kimberley het al die volledige lys gesien nie aangesien kandidate een vir een ingeroep en oor hul posisie ingelig is.

Gister het Louw bevestig dat sy vrou die tweede plek vir Kimberley beklee, maar ontken dat sy ooit aansoek gedoen het om ongeskik verklaar te word.

“My vrou het soos enige kandidaat aansoek gedoen. Nêrens in die regulasies word dit verbied nie. Ek was nêrens daarby betrokke nie,” het hy aan Rapport gesê.

Louw sê sy vrou is al 18 maande siek nadat sy ’n besering by die werk opgedoen het.

Sy is steeds onder mediese behandeling en begin weer in Augustus te werk.

Indien sy vrou verkies word, gaan hulle nie in dieselfde koukus dien nie.

Oor beskuldigings dat onervare kandidate bo ervare lede gekies is, sê hy ondervinding word mettertyd opgedoen.

  • Intussen het ontevrede DA-kandidate vir die Phokwane- munisipale raad by die DA-leier, Mmusi Maimane, gekla oor sommige kandidate vir poste wat glo in die beginfase op keuringspanele gedien en dus medekandidate beoordeel het.

In die brief aan Maimane word ook skok uitgespreek dat die eerste en derde kandidate vir dié raad strafregtelike sake teen hulle het en nog in die hof moet verskyn.

Hulle is ook ontevrede met die appèlproses. “Ons wil ons uiterste ontevredenheid uitspreek oor die proses en die algemene begunstiging van sommige, asook die feit dat kandidate se bydrae tot die party nie in ag geneem is nie.” Bron: Netwerk24

Enjoyed this post? Share it!