Kubaanse ingenieurs verspil hulle tyd

Die 35 Kubaanse water-ingenieurs wat na die land gebring is om die dreigende waterkrisis in die land af te weer, is weens hul “goeie kwalifikasies” en “sterk politieke sienings” aangestel.
Dit is die rede wat die Minister van die Departement van Water en Sanitasie (DWS), Nomvula Mokonyane, aangevoer het vir die invoer van ingenieurs wat sedert hulle aankoms in Februarie vanjaar, so ‘n lae porfiel handhaaf dat niemand weet wat hulle doen nie.
Volgens bronne in die Departement werk van die ingenieurs in die Departement se hoofkantoor in Pretoria, terwyl die ander na landelike gebiede ontplooi sou word.
Hoewel die Departement gebuk gaan onder ’n tekort aan ervare, opgeleide ingenieurs, is daar ’n moratorium op die aanstelling van nuwe ingenieurs, tegnici en wetenskaplikes.
Op ‘n vraag deur ‘n opposisielid oor wanneer die moratorium opgehef gaan word, het sy geantwoord wanneer daar ’n tekort aan kundiges is.
Volgens die Suid-Afrikaanse Instituut vir Siviele Ingenieurs (Saice) het munisipaliteite in Suid-Afrika skaars die helfte van die professionele ingenieurs wat vir basiese dienslewering benodig word in diens.
Saice het sy misnoeë oor die Kubaanse ingenieurs uitgespreek omdat hulle kwalifikasies nie internasionaal erken word nie en daar dus geen manier is om te bepaal wat die gehalte van hul opleiding is nie.
Volgens die Kubane se plaaslike kollegas is hulle opgelei in ondergrondse waterstelsels en verstaan nie ’n bloue duit van Suid-Afrika se waterstelsels nie. – Die Vryburger

Enjoyed this post? Share it!